«Реал» ҳужумчиси Эндрикка «Челси» ва «Арсенал» қизиқиш билдирмоқда. Бу ҳақда TEAMtalk хабар берди.
Бразилиялик форвард қишдан бери «Лион»да ижара асосида ўйнамоқда. Бироқ «қаймоқранглилар» лондонликларга 19 ёшли футболчини сотиш вариантини кўриб чиқмаётганини маълум қилган.
Қайд этилишича, «Реал» келаси мавсум учун режаларида Эндрикка таянади ва унинг қайтишини кутмоқда. Шунингдек, форварднинг ўзи ҳам Мадридда қолиб, асосий таркиб учун курашишга қатъий қарор қилган.
«Лион» сафида Эндрик барча мусобақаларда 18 та ўйинда 7 та гол урди. Унинг «Реал» билан амалдаги шартномаси 2030 йил ёзигача мўлжалланган.
Аввалроқ Эндрик «Лион»даги жамоадошларига Play Station 5 совға қилгани маълум қилинганди.
