Франция миллий жамоасининг собиқ футболчиси, 1991 йилги «Олтин тўп» соҳиби Жан-Пер Папэн Килиан Мбаппенинг мукофот арафасидаги баёнотларини кескин танқид қилди. Унинг фикрича, «Реал» ҳужумчисининг ўзини тарғиб қилишга қаратилган услуби унга зарар келтирган.
«Мбаппенинг ўзини кўрсатиш стратегияси унга жиддий зарар етказди. Бу — унинг қандай инсон эканини кўрсатади», — деди Папин «RMC Sport» радиоканалидаги Жером Ротеннинг дастурида.
Сўнгги ҳафталарда Мбаппе 2026 йилги «Олтин тўп» учун асосий фаворит эканини бир неча бор таъкидлаган ва «Ўтган мавсумда мендан яхшироқ ҳеч ким ўйнамади», деган эди. Бироқ франциялик футболчи овоз бериш натижаларига кўра иккинчи ўринни эгаллаб, «Бавария» ҳужумчиси Ҳарри Кейнга имкониятни бой берди.
Папэн Мбаппенинг ўзини бошқалар олдида тарғиб қилишига ҳожат йўқлигини айтди. Унинг фикрича, франциялик ҳужумчининг хатти-ҳаракатлари Криштиану Роналдони эслатади.
«Мбаппе менга бироз Криштиану Роналдони эслатади: ҳамма унинг хизматида бўлиши керакдек туюларди», — деди собиқ футболчи.
Шу билан бирга, Папэн Мбаппенинг футболчилик салоҳиятига шубҳа қилмаслигини таъкидлади. Унинг фикрича, ҳужумчи келажакда «Олтин тўп»ни қўлга киритиши мумкин, аммо бунинг учун ҳали кўп иш қилиши керак.
«Самарадорлик борасида у Криштиану Роналду эришган даражадан унчалик узоқ эмас. Аммо ўзини тарғиб қилиш кампанияси унга қарши ишлади. Мбаппеда бу совринни ютиш учун барча сифатлар бор. Бу «ҳозир ёки ҳеч қачон» дегани эмас. Бу яхши имконият эди, аммо унинг олдида ҳали йўл бор», — дея қўшимча қилди Папэн.
Маълумот учун, Мбаппе ушбу мавсумда «Реал» сафида барча турнирларда 13 та баҳсда қатнашиб, 14 та гол урди ва учта голли узатмани амалга оширди.
Эслатиб ўтамиз, франциялик ҳужумчи яқинда «Барселона»га қарши «Эл Класико»да дубл қайд этиб, «Реал»нинг ғалабасига ҳисса қўшган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади