Fransiya milliy jamoasining sobiq futbolchisi, 1991 yilgi «Oltin to‘p» sohibi Jan-Per Papen Kilian Mbappening mukofot arafasidagi bayonotlarini keskin tanqid qildi. Uning fikricha, «Real» hujumchisining o‘zini targ‘ib qilishga qaratilgan uslubi unga zarar keltirgan.
«Mbappening o‘zini ko‘rsatish strategiyasi unga jiddiy zarar yetkazdi. Bu — uning qanday inson ekanini ko‘rsatadi», — dedi Papen «RMC Sport» radiokanalidagi Jerom Rotenning dasturida.
So‘nggi haftalarda Mbappe 2026 yilgi «Oltin to‘p» uchun asosiy favorit ekanini bir necha bor ta’kidlagan va «O‘tgan mavsumda mendan yaxshiroq hech kim o‘ynamadi», degan edi. Biroq fransiyalik futbolchi ovoz berish natijalariga ko‘ra ikkinchi o‘rinni egallab, «Bavariya» hujumchisi Harri Keynga imkoniyatni boy berdi.
Papen Mbappening o‘zini boshqalar oldida targ‘ib qilishiga hojat yo‘qligini aytdi. Uning fikricha, fransiyalik hujumchining xatti-harakatlari Krishtianu Ronaldoni eslatadi.
«Mbappe menga biroz Krishtianu Ronaldoni eslatadi: hamma uning xizmatida bo‘lishi kerakdek tuyulardi», — dedi sobiq futbolchi.
Shu bilan birga, Papen Mbappening futbolchilik salohiyatiga shubha qilmasligini ta’kidladi. Uning fikricha, hujumchi kelajakda «Oltin to‘p»ni qo‘lga kiritishi mumkin, ammo buning uchun hali ko‘p ishlashi kerak.
«Samaradorlik borasida u Krishtianu Ronaldu erishgan darajadan unchalik uzoq emas. Ammo o‘zini targ‘ib qilish kampaniyasi unga qarshi ishladi. Mbappeda bu sovrinni yutish uchun barcha sifatlar bor. Bu “hozir yoki hech qachon” degani emas. Bu yaxshi imkoniyat edi, ammo uning oldida hali yo‘l bor», — deya qo‘shimcha qildi Papen.
Ma’lumot uchun, Mbappe ushbu mavsumda «Real» safida barcha turnirlarda 13 ta bahsda qatnashib, 14 ta gol urdi va uchta golli uzatmani amalga oshirdi.
Eslatib o‘tamiz, fransiyalik hujumchi yaqinda «Barselona»ga qarshi «El Klasiko»da dubl qayd etib, «Real»ning g‘alabasiga hissa qo‘shgan.
Muxlislar bu yangilikni Telegram’da muhokama qilmoqda
Izohlar Telegram’da ochiladi