«Челси» ҳужумкор яримҳимоячиси Коул Палмер Лондон клуби билан шартномасини узайтиргани ҳақида фикр билдирди. Янги келишув 2034 йил ўрталаригача амал қилади. Футболчи клубнинг ривожланиш йўналишидан мамнун эканини ва жамоа билан катта совринларни қўлга киритишни исташини таъкидлади.
«Челси» мен учун жуда катта аҳамиятга эга. Клуб тўғри йўналишда ривожланмоқда, шу сабабли шартнома имзолаганимдан хурсандман. Мен жуда бахтлиман. Клуб эгалари, спорт директорлари ва, албатта, бош мураббий билан бўлган суҳбатлар менга ишонч бағишлади. Шу боис янги шартнома имзолаш мутлақо тўғри қарор бўлди.
Футболчилар билан суҳбатлашганимда, барчамизнинг мақсадларимиз бир хил эканини кўряпман. Бу ерда мунтазам равишда йирик совринларни қўлга киритишимиз мумкинлигини ҳис қиляпман. Мен ҳам ушбу жараённинг бир қисми бўлишни ва бунда муҳим рол ўйнашни истайман», — дея Палмернинг сўзларини «Челси» матбуот хизмати келтирди.
Эслатиб ўтамиз, «Челси» сўнгги бор Англия чемпионлигини 2017 йилда Антонио Конте бошчилигида қўлга киритган. Коул Палмер эса Лондон клубининг келажакдаги муваффақиятларида муҳим ўрин тутишни мақсад қилган.
