24 октябр куни БААнинг Абу Даби шаҳрида бўлиб ўтадиган UFC 333 турнирида ўзбекистонлик жангчи Рамазон Темиров UFC енгил вазн тоифаси рейтингида 6-ўринни эгаллаб турган Лонир Каванага қарши октагонга чиқади.
Жанг олдидан Saq Pro Team жамоаси бош мураббийи ва яккакурашлар бўйича эксперт Даулет Нурланул Sports24.kz нашрига берган эксклюзив интервюсида Темировнинг имкониятларини баҳолади.
Аввалроқ ўзбекистонлик спортчи допингга қарши қоидаларни бузгани учун дисквалификациядан қайтгач, аввалги жангида австралиялик Стив Эрцегга қарши октагонга чиқиб, уни биринчи раундда нокаутга учратган эди. Ушбу ғалаба ўзбекистонлик жангчининг UFC рейтингига киришига имкон берди.
Кавана эса 2026 йил бошида UFC собиқ чемпиони Брэндон Моренони мағлуб этган. Бироқ кейинги жангда Брэндон Ройвалга бўғиш усули билан имкониятни бой берган.
«Темиров ва Кавана ўртасидаги жангни ҳали чуқур ўрганганим йўқ. Аммо UFC Темировга қандай имконият бераётгани яққол кўриниб турибди. Ўтган сафар ўзбекистонлик жангчи дисквалификациядан қайтгач, рейтингнинг кучли ўнталигидаги рақибга қарши жанг қилди ва Стив Эрцегни нокаутга учратди. Бу сафар эса унга рейтингда янада юқорироқ ўринда турган жангчи берилди.
Эҳтимол, UFC Ўзбекистон аудиториясига қизиқиш билдираётгандир. У тик туриб жанг қилади ва рақибларини нокаутга учратади», — дея таъкидлади мураббий.
Нурланулнинг фикрича, Кавана устидан қозониладиган ғалаба Темировнинг енгил вазн тоифасида чемпионлик жанги учун курашдаги мавқеини сезиларли даражада мустаҳкамлаши мумкин.
«Агар у бу рақибини ҳам нокаутга учратса ёки томошабоп тарзда ғалаба қозонса, чемпионлик учун курашда бизнинг Асу Алмабаевдан ўзиб кетиши мумкин», — дея хулоса қилди Даулет Нурланул.
