«Манчестер Юнайтед» «Фиорентина»нинг ҳужумчи Жошуа Зиркзе ижараси бўйича таклифини кўриб чиқмоқда.
Инсайдер Фабрицио Романонинг хабар беришича, италияликлар футболчи учун 5 миллион евро тўлашга, унинг маоши бўйича харажатларни ўз зиммасига олишга, шунингдек, уни тўлиқ сотиб олиш бандини фаоллаштиришга тайёр.
25 ёшли нидерландиялик футболчининг манкунианликлар билан амалдаги шартномаси 2029 йилнинг 30 июнигача мўлжалланган. Унинг трансфер қиймати 20 миллион еврони ташкил этади.
Ҳужумчи «МЮ» сафида икки йил давомида 75 та ўйинда майдонга тушиб, тўққизта гол урди ва тўртта голли узатмани амалга оширди.
Футболчининг вакиллари ҳам «бинафшаранглар»нинг таклифини ўрганмоқда. Зиркзе кейинроқ жавоб беришга ваъда берди.
