«Бунёдкор»га Иван Бошкович яна бош мураббийликка қайтгач, илк ўйинин «Сурхон»га қарши ўтказди. Аммо омадсиз чиқди ва 0:1 ҳисобида «Бунёдкор» мағлуб бўлди. Ўйиндан кейин Бошкович матбуот анжуманида иштирок этди.
— Аввало, барчангизга салом айтаман. Футболни, Ўзбекистонни ҳам бироз соғиниб қолибман. Ўйин ҳақида нима дейишим мумкин? Кеча ўйинга тайёргарлик жараёнида рақибни яхши таҳлил қилдик. Бугун сизлар «Бунёдкор» аввал қандай футбол ўйнаган бўлса, шунга ўхшаш ўйинни кўрдингиз, деб ўйлайман.
Мен талаб қилган нарсалар — жамоанинг яхши ташкил этилгани, интизомли ҳаракат қилиши эди. Тўпни олиб қўйганимиздан кейин тезкор ҳужумларга чиқишни кутдик. Бир неча марта буни амалга ошира олдик. Гол уриш учун бироз омад етишмади. Аммо энг муҳими — майдонда жамоани кўрдим. Йигитлар таслим бўлишмади, охиригача ўйнашди. Бугун биз учун энг муҳими ютқазмаслик эди.
Албатта, қизил карточка ҳам бироз таъсир қилди. Майдонда бир киши кам бўлиши, ўзингиз тушуниб турибсиз, ўйинга таъсир қилади, ҳимояланишни қийинлаштиради. Лекин футболчиларимга ҳеч қандай эътирозим йўқ. Менимча, улар яхши ўйнашди, сифатли футбол намойиш этишди.
Биз ишлашда давом этамиз. Қўлни тушириб қўймаймиз. Олдимизда ҳали ўнта ўйин бор — бу 30 очко дегани. Ҳар бир учрашувда ўз очколаримиз учун курашамиз. Вазиятни тўғрилаш мумкин, мен бунга ишонаман. Шунинг учун ҳам бу ерга келдим.
— Журналистлар ёзган хабарларга кўра, сизнинг шартномангиз бир неча кун давомида ҳатто рўйхатдан ўтказилмаган. Кейин келдингиз ва кечаги ўйин олдидан машғулот ҳам бўлмагани ҳақида ёзишди. Умуман, ушбу учрашувга тайёргарлик жараёни қандай ўтди? Шунингдек, клуб раҳбарияти билан жамоанинг қолган ўйинлари, яъни олдиндаги 30 очко ҳақида нималарни муҳокама қилдингиз? Балки жадвалдаги ўринни тўғрилаш мумкин. Ҳозир беш очколик узилиш бор, бу мағлубият ҳам вазиятни оғирлаштирди. Асосий мақсад — Суперлигада қолиш. Буни қандай амалга ошириш мумкин?
— Кейинроқ кўрамиз, Худо хоҳласа. Бизда куч борлигига ишонаман. Охиригача курашамиз, таслим бўлмаймиз. «Бунёдкор» аввал ҳам қийин вазиятларни бошидан ўтказган. Менимча, клуб ҳар доим бундай ҳолатлардан чиқиш учун куч топа олган. Бу сафар ҳам шундай бўлади. Тайёргарликка келадиган бўлсак, майдонда кўп ишлаш учун вақт бўлмади. Лекин рақибни яхши таҳлил қилдик. Жамоанинг кучли томонларидан фойдаланишга ҳаракат қилдик. Рақибнинг баъзи вазиятларида ўзимизнинг тезлигимиздан фойдаланмоқчи бўлдик. Менимча, бу бир неча марта самара берди. Энг муҳими, футболчиларим мураббий сифатида қўйган талабларимни бажаришди. Бу менга ёқди. Менимча, бу футболчилар бундан ҳам яхшироқ натижага лойиқ. Ҳозир айрим футболчиларимиз жароҳатланган. Тажрибали футболчилар қайтиб келганидан кейин ўйин сифатида кўп нарса яхшиланади, деб ўйлайман. Шунинг учун ишлашда давом этамиз.
— Ҳозирги вазият... Тез орада Суперлиганинг бошқа жамоаларидаги ҳолатни ҳам кўрамиз. Мен сизнинг футболга бўлган муҳаббатингизни жуда яхши тушунаман. Ўзингиз айтганингиздек, футболни соғингансиз. Лекин молиявий томон ҳам одамлар учун жуда муҳим. Ҳар бир футболчининг оиласи бор. Шуни ҳисобга олган ҳолда, клуб молиявий жиҳатдан йўқолиш арафасида турган бир пайтда сизнинг «Бунёдкор»га келишингизда қандай мотивация бўлди? Нима сизни шундай вазиятда клубга келишга ундади?
— Қаранг, мен бу муаммолар ҳақида анча олдиндан эшитиб келганман. Сизлар ҳам биласизлар, ҳамма бу ердаги вазият қийинлигини яхши билади. Лекин мен «Бунёдкор»да уч йил ишлаганман ва ҳозирги вазиятда жамоага ёрдам беришни ўз бурчим деб ҳис қилдим. «Бунёдкор»ни бундай вазиятдан олиб чиқиш учун қўлимдан келган барча ишни қиламан. Ҳозир эса менимча, эътибор фақат шу томонга қаратилиб қолган. Мен ҳозир футболчиларнинг майдонга чиқиб, футбол ҳақида ўйлашлари учун ҳаракат қилмоқчиман. Улар футбол ҳақида ўйлашлари керак. Кейин вақт келади — декабрь ойи келади ва шунда футболчилар билан боғлиқ масалалар, кейин нима бўлиши ҳақида гаплашамиз. Ҳозир декабргача бизнинг қўлимизда бўлган нарса — бирлашиш ва бор кучимизни бериш. Бугун ҳам шундай қилдик. Мен хотиржам ухлай оламан. Нега? Чунки футболчилар бугунги ўйинда бор имкониятларини ишга солганига ишонаман.
Яна бир бор айтаман: мен футбол ҳақида гаплашишни хоҳлайман. Бундай саволлар ва раҳбарият билан боғлиқ масалаларни муҳокама қилиш вақти ҳам келади. Бугун майдонда диққатини бир жойга жамлаган ва яхши ташкил этилган жамоани кўрдим. Албатта, қийинчиликлар орқали спортда буюк спортчилар етишиб чиқади. Ҳаётда ҳам шундай: инсон қийинчиликларга дуч келганда ўсади. Шунинг учун мен бу вазиятда кўплаб ёш футболчилар учун ўсиш, ривожланиш ва ўзини кўрсатиш имкониятини кўряпман. Мен нима қилиш кераклигини биламан. «Бунёдкор» бу вазиятдан чиқиши ва Суперлигада қолиши керак. Бу асосий мақсад. Олдимизда ҳали уч ой бор. Вазиятни тўғрилаш учун жуда кўп ишлашимиз керак.
— Жамоада пасайиш бўлиши мумкин, одатда бундай вазиятларда мураббий алмашади ва жамоада ҳамма нарса ўзгаради, ғалабалар бошланади. Бу эмоционал кўтарилиш бўлади. Шундай ҳолатда биз ҳам ўзгаришларни кутяпмиз…
— Мен ижобий жиҳатларни кўрдим. Кутганимдан анча кўпроқ ижобий нарсалар бор. Ҳаяжон бор эди, албатта, ҳаяжон кўп бўлди. Лекин футболчилар совуққонликни сақлай олгани, юраги билан ўйнагани учун уларга раҳмат айтаман. Сиз «пасайиш» дедингиз. Қайси маънода пасайиш? Футболчиларнинг сифатига реал қарасак, улар малакали футболчилар, лекин жамоа жуда ёш. Шунинг учун бунинг барчасини ҳисобга олиш керак. Менимча, жамоада ўйин жиҳатидан жиддий пасайиш бўлмади. Лекин психологик ҳолат натижага таъсир қилади, деб ўйлайман. Шунинг учун кайфиятни кўтариш, футболчиларни рағбатлантириш ва мотивация бериш устида ишлаймиз. Аввал ҳам айтдим, яна такрорлайман: бу кўплаб футболчилар учун ўзини кўрсатиш ва футболчи сифатида ўсиш учун катта имконият. «Бунёдкор»дан аввал ҳам қийин вазиятларда яхши футболчилар етишиб чиққан. Кўриб турганингиздек, қийинчилик бор жойда ўсиш учун ҳам муайян имконият бўлади.
— Катта пул бўлганда, менимча, кўпчилик ёш футболчилар ҳақида ўйламай қўяди. Масалан, ўтган йиллари «Бунёдкор»да ҳам қанча легионерлар бўлгани, жамоа қурилгани ҳақида гапирилди. Умуман, кўп пул бўлганда ҳеч ким ёшлар ҳақида ўйламайди. Пул қолмаганда эса, «ёшларга имконият бериш керак», деган гаплар бошланади. Сизнингча, бу муаммонинг сабаби нимада? Ўзбекистон клубларида ёш футболчиларга муносабат қандай бўлиши керак?
— Барча клубларда муайян стратегия бўлиши керак. Буни ўзингиз ҳам айтдингиз. Стратегия ёки режа кўп жиҳатдан маблағга боғлиқ. Ҳатто режа бўлмаса ҳам, вазият ўзгариши билан ҳамма нарса ўзгариб кетади. «Бунёдкор»да бошқа клублардагидек катта маблағлар йўқлигини ҳисобга олиш керак. Албатта, клубда академия бор ва тайёр бўлган ёш футболчиларга ҳар доим имконият беришга ҳаракат қилиш керак. Бошқа клублар эса ўз стратегиясини белгилаши керак. Ҳар бир клубнинг вазифаси ҳар хил. Раҳбарият ўзгаради, кейин пул пайдо бўлади, бир йилда вазифа Суперлигада қолиш бўлса, кейинги йил чемпионлик мақсади қўйилади. Шунинг учун бу саволни айнан клуб раҳбариятларига бериш керак. Клублар ўз режаси ва стратегиясини белгилаб олиши лозим. Узоқ муддатли режа бўлиши ва шу асосда ишлаш керак. Биз, мураббийлар эса раҳбарият қўйган талабларни бажаришимиз керак. Ҳозир биз шундай вазиятдамизки, энг муҳим вазифамиз — Суперлигада қолиш.
Ким ўйнайди? Қўлимизда ким бор? Мен энг яхши таркибни танлайман. Футболчининг ёшига қарамайман. Ҳозир айни шу пайтда, жамоани қутқариш ва очколарни қўлга киритиш учун ким керак бўлса, ўша футболчи майдонга тушади.
— Охирги савол. Ҳозир сиз «Бунёдкор»га келдингиз. Нега аввалги мураббийлардан кейин айнан сиз таклиф қилиндингиз, деган фикрлар бор. Шундай қараш ҳам борки, сизнинг «Бунёдкор»га қайтишингизга сабаб — сизнинг мураббийлар штабидаги ёрдамчингиз «Бунёдкор» раҳбариятидаги Мурод Алиевнинг ўғли экани. Бу қанчалик боғлиқ? Биласиз, ўзбекларда таниш-билиш орқали иш битириш деган тушунча бор. Балки сизлар қаердадир таниш бўлганингиз учун шу қарор қабул қилингандир, деган гаплар ҳам бор. Бу ҳақда нима дейсиз?
— Одамлар ҳар доим гапиришади. Мен эса ўз ишим билан шуғулланаман. Ҳозир ҳам, аввал ҳам шундай фикрда бўлганман: бизни натижа қутқаради. Натижа бўлмаса, сен ҳақиқатан ҳам қийин вазиятга тушасан. Лекин натижа бўлади. Мен бу ерга келдим. Одамлар хоҳлаган гапини гапираверсин. Мен учун энг муҳими — ўзим биламан ва ишонаманки, бу сафар ҳам, аввалгидек, вазифамни бажара оламан. Шунинг учун одамлар нима хоҳласа, шуни гапираверсин. Бу ерда мени ҳеч нарса безовта қилмайди ва ишимга халақит бермайди. Клубда, мураббийлар штабида биз билан ишлайдиган мутахассис бор. У яхши мутахассис, мен бунга ишонаман. Биз олти йилдан бери бирга ишлаймиз. Аввал ҳам ҳамкорлик қилганмиз. У яхши инсон ва яхши мутахассис бўлгани учун бирга ишлаяпмиз. Мен унга ишонаман, у менга ёрдам беради. Аввал ҳам натижа учун бирга ишлаганмиз. Шунинг учун ҳамкорлигимизни давом эттиряпмиз», - дея Бошковичнинг сўзларини келтиради Tribuna.uz мухбири.
