«Борнмут» бош мураббийи Андони Ираола мавсум якунида жамоани тарк этади.
Бу ҳақда клуб расмий сайти орқали маълум қилди.
Қайд этилишича, мутахассиснинг кетиши билан унинг «Борнмут»даги уч йиллик фаолиятига якун ясалади.
Ираола жамоани 2023 йил 1 июлдан буён бошқариб келаётганди.
Унинг амалдаги шартномаси 2026 йил 30 июнгача мўлжалланган.
Испаниялик мутахассис ўз баёнотида клубда ишлаган давридан мамнун эканини таъкидлади.
«Борнмут»ни бошқариш мен учун шараф бўлди. Биргаликда эришган натижаларимиздан фахрланаман.
Мен билан ишлаган футболчилар ва штабга миннатдорман. Мухлислар эса доим фантастик қўллаб-қувватлади, бунинг учун улардан доимо миннатдор бўламан.
Менимча, бу мен учун четга чиқишнинг айни вақти. Аммо бу клуб ҳақидаги ажойиб хотиралар доим мен билан қолади», — деди Ираола.
Маълумот учун, Ираола қўл остида «Борнмут» ўтган мавсум тарихидаги энг яхши натижаларидан бирини қайд этиб, 56 очко билан 9-ўринни эгаллаган эди.
Ушбу мавсум 32 турдан кейин «Борнмут» 45 очко билан АПЛ турнир жадвалида 11-ўринда бормоқда.
