«Удинезе» бош мураббий Коста Руняич билан ҳамкорликни тўхтатди. Бу ҳақда клуб расмий сайти хабар берди.
Football Italia нашри хабар беришича, унинг ўрнига Паоло Занетти тайинланиши кутилмоқда. Янги мураббий билан шартнома имзолаш қолган, холос.
Германиялик мутахассисни истеъфога чиқариш ҳақидаги қарор бир неча кунлик муҳокамалардан сўнг 2 ноябр куни қабул қилинган. Руняич жамоани ғалабасиз ўтказилган кетма-кет 8 та ўйиндан кейин тарк этмоқда.
«Удинезе» бу мавсумда Италия чемпионатидаги ягона ғалабасини 29 август куни «Монца»га қарши баҳсда қўлга киритган эди.
Мураббий учун сўнгги учрашув «Рома» клубига қарши ўз майдонида ўтказилган ва 2:5 ҳисобидаги мағлубият билан якунланган баҳс бўлди.
Ҳозирда жамоа А Серия доирасида 10 та ўйиндан сўнг 5 очко тўплаган ҳолда 17-ўринда бормоқда.
Паоло Занетти эса феврал ойидан буён ишсиз. У сўнгги бор «Верона» жамоасини бошқарганди.
