«Ал Иттиҳод» ҳужумчиси Карим Бензема бугун «Ал Фотиҳ»га қарши ўйинда майдонга тушишдан бош тортди. Бу ҳақда журналист Ариэл Пилло хабар берди.
Бунга сабаб саудияликлар футболчининг янги шартнома бўйича қўйган талабларини қондирмаганидир. Жамоа ичида Бенземанинг талаблари ҳаддан ташқари юқори деб баҳоланмоқда. Унинг хатти-ҳаракати эса нопрофессионаллик дея қабул қилинган.
Маълум қилинишича, Бензема «Ал Иттиҳод»дан Криштиану Роналдуники каби маош талаб қилмоқда. Бироқ клуб бундай миқдордаги маошни тўлаш имконига эга эмас ва шу сабабли футболчи билан янги битим имзолашдан бош тортмоқда.
Ҳужумчи эса ўз талаблари бажарилмагунча майдонга чиқиш ниятида эмас. Аввалроқ Бензема «Ал Иттиҳод»ни тарк этиши маълум қилинганди.
