Бектемир Абдуманнонов: «Агар яхши таклиф бўлса Ўзбекистон Суперлигасига қайтаман»

Қозоғистон чемпионатда тўп тепаётган легионеримиз Бектемир Абдуманнонов у ерда ҳам маҳаллий мухлисларнинг олқишларига сазовор бўлиб келяпти.

«Окжетпес» клуби шарафини ҳимоя қилаётган ҳамюртимиз ўз жамоасида тобора етакчилардан бирига айланиб боряпти. Мураббийларнинг ишончини қозонаётгани эътиборга молик. Бектемир Tribuna.uz'га интервю берди.

- Бектемир, Қозоғистонда фаолият олиб бораётган легионер сифатида айтинг-чи, у ерда қандай янгиликлар бор? Футбол савияси қандай?

- Ассалому алайкум. Бизни футболдан шароитлар бўйича бироз олдинда. Бу ерда футбол учун ҳамма шароитлар бор.

- Қозоғистонда табиий майдонлардан кўра, сунъий майдонлар кўп ва чемпионат ўйинлари ҳам кўпинча сунъий майдонларда ўтади. Бу сизга ноқулайлик туғдирмаяптими?

- 16 та жамоадан 11-12 та жамоани стадиони сунъий майдон. Чунки бу ердаги об-ҳаво Ўзбекистонга қараганда совуқроқ. Шунинг учун сунъий майдонда ўйнаган яхшироқ. Ноқулайлик томони йўқ. Сунъий бўлса ҳам стадионлар анча эътиборга олинган.

- «Окжетпес» сафида ҳозиргача 3 та гол уришга эришдингиз. Статистик натижалар сизни қизиқтирадими? Умуман айтганда, яна нечта гол урмоқчисиз?

- Биринчи навбатда жамоага ёрдам бериш, кейин статистика ўзи бўлаверади. Йил охиригача ўзимни ҳар томонлама кўрсатиб, жамоага ёрдам беришни ният қилганман.

- Жамоа чемпионатда 3-ўринни эгаллаб турибди. Асосий вазифа қандай?

- Мақсад юқори учликка кириш ва Конференциялар лигасида иштирок этиш.

- Орада сизни яна Ўзбекистонга қайтиши мумкин деб эшитгандим. Агар имкони бўлса қайтасизми?

- Агар яхши таклиф бўлса қайтаман. Лекин ҳозир ҳеч кимдан таклиф йўқ. Шу боис ҳозирда шу ерда ўз ўйинимни кўрсатишга ҳаракат қиляпман.

- Бизда техникага кўпроқ таянилади. Қозоғистонда кураш, жисмоний ҳолат устувор. Сизда эса техника яхши ривожланган. Шу томонлама қийналмаяпсизми?

- Бошида озгина қийинчилик бўлди. Жисмоний футбол бўлгани учун мослашяпман. Қозоғистон клубларида ҳам ўзига яраша техникали ўйинчилари бор. Жисмоний тарафлама ўсишга эришсам ўзим учун яна бир ютуқ бўлади.

- Яқинда Шаҳбоз Умаров ҳам жамоадошингизга айланди. У келгач, клубда ўзингизни янада эркин ҳис қиляпсизми?

- Шаҳбоз Умаровни келганидан хурсанд бўлдим. Энди бир жамоада биргаликда ҳаракат қиламиз.

- Ўзбекистон миллий жамоамизнинг мундиалдаги иштирокини қандай баҳолайсиз?

- Яхши ўйинлар бўлди. Биз жаҳон чемпионатида биринчи марта қатнашдик. Футболимиз анча ўсиб бормоқда. Натижа ёмон бўлгани билан бизга тажриба бўлди.

- Қозоқларда ҳамма мақтаётган Дастан Сатпаевга қарши ўйнадингизми? У ерда уни Абдуқодир Хусанов билан солиштиришади...

- Йўқ, чунки «Қайрат» жамоаси билан 3 кун олдин ўйнадик. У «Челси» жамоасига кетди. Шу боис унга қарши ўйнаш насиб қилмади. Аммо яхши футболчи, ўйинларини кузатдим. Ёшига нисбатан анча бақувват футболчи.