Бахтиёр Қосимов: «Олдимда бир қанча вариантлар бор эди, аммо ўзимни Малайзияда синаб кўришни истадим»

Яқинда ўзбек футболчиси – Бахтиёр Қосимов Малайзиянинг «Пеханг» клуби билан шартнома имзолаганидан хабарангиз бўлса керак.

У ўтган мавсумни Ироқ чемпионатида ўтказганди. Энди эса яна легионер мақомини сақлаб қолган ҳолда Малайзия чемпионатига кўчиб ўтди. Куни кеча Tribuna.uz журналисти Қосимов билан боғланди.

- Бахтиёр, нега айнан «Пеханг»ни танладингиз? Бу қарорда ҳал қилувчи омил нима бўлди?

- Менинг олдимда Ироқ чемпионатини ўзидан, Ўзбекистон ва яна бошқа хориж клубларидан таклифлар бор эди. «Пеханг» жамоасини танлашимни сабаби, ўзимни Малайзия чемпионатида синаб кўришни истадим.

- Ироқ чемпионатидаги бир йиллик фаолиятингиздан энг катта сабоқ нимани олдингиз?

- Ироқ чемпионатидан охиригача курашиш ва таслим бўлмасликни ўргандим.

- Ўзбекистон, Қатар, Ироқ ва Малайзия чемпионатларини ўйин суръати, жисмоний тайёргарлик ва тактика бўйича қандай таққослайсиз?

- Малайзия чемпионатида ҳали асосий ўйинларни ўтказганим йўқ. Ироқ, Қатар, Ўзбекистон чемпионатларини ўртасидаги фарққа келсак, Ироқда курашувчан футбол, Қатарда тактика ва техникага кўпроқ эътибор берилади. Ўзбекистонда эса ҳаммаси мавжуд.

- Малайзия чемпионатида охирги пайтларда легионерларимиз камайганди ва бунга сабаб молиявий узилишлар келтирилаётганди. Сизни у ерга йўл олишингиз таваккалчилик эмасми? Янги клубингизда молиявий барқарорлик мавжуд, деб ўйлайсизми?

- Мен доим ишимни Худога таваккал қилиб бошлаганман. Ҳозирда клубимнинг молиявий аҳволи анча яхшигина. Олдига керакли вазифалар қўйилган.

- Легионер сифатида ҳар сафар янги мамлакат, янги муҳитга мослашиш қанчалик қийин? Бу сафар олдингиларга қараганда осонроқ бўладими?

- Ҳа, тўғри, янги жамоада мослашиш қийинроқ кечади. Лекин мен учун ҳар доим осон кечган. Жамоага тез киришиб кета оламан.

- Сизга кўра, Ўзбекистон чемпионатида ўйнаб туриб ҳам Осиёнинг кучли лигаларига чиқиш мумкинми ёки бунинг учун бошқа йўл тутиш керакми?

- Қайси клубидан ва қандай таклиф чиқишига боғлиқ.

- Малайзия чемпионатида ўз олдингизга қандай шахсий мақсад қўйдингиз?

- Миллий жамоа сафида бир марта бўлса ҳам майдонга тушиш. Албатта, бу ҳамма футболчининг энг катта орзуларидан бири бўлса керак.

- Орқага қараб, фаолиятингизда «бошқача қарор қилсам бўлар экан», деган танловингиз борми?

- Тўғри, қаердадир нотўғри қарор қабул қилган бўлишим мумкин. Лекин албатта, Худога шукр қиламан, Аллоҳ томонидан шу имкониятлар берилганига.

- Янги жамоангизда ҳамюртларимиздан яна кимдир борми?

- Ўзбек футболчиси Мурод Бобожонов ҳам бор. У билан Ироқда ҳам бир клубда тўп тепдим. Бу йил ҳам тақдир насиб қилди.