Суперлиганинг 20-турида «Қўқон-1912» ўз майдрнида «Динамо»ни қабул қилди. Баҳс эса 1:1 ҳисобидаги дуранг натижа билан якун топди. Ўйиндан сўнг қўқонликлар устози Андрей Шипилов матбуот анжуманида қатнашди.
— Шундай айтаман: уйдаги иккита ўйин ҳам бир қолипда ўтди. Шунчаки, бир хил сценарий. «Бухоро»га қарши учрашув ҳам, «Динамо»га қарши баҳс ҳам худди шундай кечди. Биринчи таймда тўлиқ назорат, тўлиқ устунлик бўлди. Ўйин тақдирини 35 дақиқанинг ўзидаёқ ҳал қилиш мумкин эди. Шунчаки, гол уриш керак эди, холос. Мен йигитларга айтгандим: «Болалар, иккита вазият бўлса — иккитасини ҳам голга айлантириш керак. Учта вазият бўлса — демак, учта гол уриш керак. Ҳеч кимни ҳам, ўзингизни ҳам қийнаманг».
Яхши, майли. Танаффусга жамоа чиройли, мантиқли гол билан чиқиб кетди. Биринчи таймда «Динамо» ҳеч нарса қила олмади. Балки уларнинг тактикаси шундай бўлгандир, билмайман. Балки Вадим Карленович биринчи таймда кучларини бироз тежаб туришни айтгандир. Билмайман, бу уларнинг иши.
Иккинчи тайм олдидан йигитларга: «Яна қўшинглар! Яна қўшинглар! Ҳаракатларда ҳам, ўйинни ташкил этишда ҳам, тузилишда ҳам янада фаол бўлинглар», дедим. Шундан кейин қандайдир асабийлик, ишончсизлик пайдо бўлди ва яна — еттинчи дақиқа, яна бизда оддий хатога йўл қўйиш.
Оддий хатонинг ўзи. Мен энди ишонч ҳосил қиляпманки, бу ҳақиқатан ҳам... бу маҳорат масаласи. Бу — ҳақиқий маҳорат. Майда деталлар ҳам жуда муҳим. Мен бу ҳақда бир неча бор сўраганман, бир неча бор айтганман. Лекин ҳеч қандай машғулот, ҳеч қандай назарий дарс, ҳеч қандай гуруҳ машғулотлари, жамоавий машғулотлар ёрдам бермайди. Агар футболчи Ўзбекистон чемпионатининг юқори дивизиони даражасида етарли маҳоратга эга бўлмаса, демак, у шу даражага мос келмайди. Гап шу.
Ҳозир кийиниш хонасида ҳам айтдим: аслида мен алмаштириш қилишни умуман хоҳламаган эдим. Агар Егор Кондратюк жароҳат олмаганида, уни ҳам алмаштирмас эдим. Кўрдингиз, умуман алмаштириш қилишни хоҳламаган эдим. Йигитлар нормал, яхши ўйлашди. Берилган вазифаларнинг барчасини бажаришди, ҳамма нарсани қилишди. Лекин маълум бир вазиятлар бор. Бу ҳақда такрорлашни истамайман. Айрим вазиятларда, ўйиннинг айрим фазаларида футболчилар ўз даражасига мос ҳаракат қила олмаяпти. Мос келмаяпти. Умуман, Суперлига даражасига мос эмас.
Биз шундай шароитда ишлашимизга тўғри келяпти. Бу бизнинг ишимиз, нима ҳам қила олардик. Қўлимизда ким бор, қайси даражадаги футболчилар бор — шу билан ишлаяпмиз. Биз кучли футболчиларни таклиф қилиб, таркибга қўша олмаймиз. Лекин тажриба ва ёш ўртасида қандайдир мувозанатни ушлаб турибмиз. Аммо бир хил хатолар яна ва яна такрорланяпти. Жамоа ҳаракат қилади, ўйнайди, ғалаба қозонади, кейин очко тўплайди ва кейин яна ҳаммасини бошидан бошлашга тўғри келади. Яна бошидан. Шунинг учун бу ўйин бўйича айтадиган бўлсам, бир нарса бир нарсага тўғри келмайди. Фарҳод ва Шаҳрух ҳақида ҳам айтишим мумкин: улар ҳеч нарсани бузишмади, лекин ўйинни кучайтиришмади ҳам. Айниқса, ҳужумда креатив ҳаракат қила олишмади. Агар биз иккинчи голни урганимизда, эҳтимол, улар ҳам ўша ҳужумда иштирок этган бўлишарди.
- Сизнингча, жамоа икки очко йўқотдими ёки бир очко қўлга киритдими?
— Биз йўқотдик. «Бухоро»га қарши ўйинда ҳам йўқотганмиз. Реал айтяпман — биз очко йўқотдик. Балким, кимдир мен билан баҳслашар: «Йўқ, йўқотмадинглар», дер. Майли, яхши. «Динамо»да миллий жамоадаги футболчилари йўқ эди, тўғри. Лекин Карленовичнинг бошқа футболчилари бор ва у уларга ишонади. Улар ҳаракат қилишяпти, ўйнашяпти. Масалан, Насимов майдонга тушди. Охирги марта қачон у асосий таркибда майдонга тушиб, ўйнаганини умуман эслай олмайман. Лекин, эҳтимол, шунинг учун туширилгандир — қандайдир тўплар учун курашди, ҳаракат қилди. Уни ҳам кучайтириш учун майдонга туширишди. Мен «агар миллий жамоа футболчилари бўлганида, Самарқанд кучлироқ кўринарди», деб айта олмайман. Биз ҳам, эҳтимол, янада масъулиятлироқ ўйнардик. Масъулиятлироқ ҳаракат қилсак, ўйиннинг кўриниши, услуби ва қолган жиҳатлари ҳам, эҳтимол, яхшироқ бўларди. Аммо футболчилардан ҳеч кимга бу ҳақда айтмаганман. Ростини айтсам, уларда миллий жамоага чақирилган футболчилар борлигини ҳам билмаган эдим. Хожимирзаев ҳам майдонга тушмади. У билан нима бўлганини ҳам унчалик қизиқиб кўрмаганман. Ростини айтсам, ҳозиргина сизлардан миллий жамоага чақирилган футболчилар ҳақида, улар билан нима бўлганини билдим. Менинг ўзимда ҳам муаммолар етарли. Ўз футболчиларим билан шуғулланяпман», - дея Шипиловнинг сўзларини келтиради Tribuna.uz мухбири
