«Бухоро» клуби Навоийда «Қизилқум»га қарши ўтган учрашувда 3:2 ҳисобида мағлубиятга учради ва қимматли очколардан маҳрум бўлди. Учрашувдан сўнг «Бухоро» бош мураббийи Александр Хомяков матбуот анжуманида қатнашди.
- Аввало, рақиб жамоани ғалаба билан табриклаш керак. Уларнинг ғалаба қозонишни жуда хоҳлагани кўриниб турди ва охир-оқибат ўз ғалабасини тортиб олишди, дейиш мумкин.
Бизга келсак, бугун бизнинг кунимиз эмас эди, шекилли. Буни қандай изоҳлаш мумкин? Масалан, биринчи бўлим статистикасига қарайдиган бўлсак, бизда тўртта зарба бор, рақибда эса битта ҳам йўқ. Лекин биз биринчи бўлимни 0:1 ҳисобида ютқазиб чиқдик. Танаффусдан кейин эса яна иккинчи голни ўтказиб юбордик.
Шундан кейин эса... бу ерда футболдан кўра эмоциялар кўпроқ бўлди. Ҳа, ҳисобни тенглаштиришга ҳаракат қилдик, лекин катта ҳисобда бугунги ўйинимиз ўхшамади. Биз ўйинга бироз бошқача режа тузган эдик. Айниқса, бу икки голни ўтказиб юборишимиз шарт эмас эди. Албатта, вазиятлардан фойдалана олмаганимиз ҳам ўз таъсирини кўрсатди. Агар биринчи бўлимда ўзимизда бўлган имкониятларни голга айлантира олганимизда, ўйин бутунлай бошқача кечиши мумкин эди. Аммо шундай бўлди. Йигитлар ҳаракат қилишди, иккита гол фарқини йўқотишга муваффақ бўлишди. Бунинг учун уларга раҳмат айтиш керак. Лекин, ростини айтсам, алам қилади. Бундан қочиб қутулиб бўлмайди. Яна бир бор рақибни ғалаба билан табриклайман.
- Сизнинг жамоа ўйинини қуришдаги режангиз нимадан иборат эди? Агар сир бўлмаса, «Қизилқум»нинг қайси хатоларига таяниб бугунги учрашув учун ўйин режасини тузган эдингиз?
- Қандай сир бўлиши мумкин? Биз рақибни жуда яхши биламиз. «Қизилқум» сўнгги тўртта ўйинда, жумладан, бизга қарши баҳсда ҳам, уйдаги барча рақибларини мағлуб этган эди. Шунинг учун асосий эътибор, албатта, дастлабки 20 дақиқага қаратилди. Уларни ҳисобда олдинга чиқиб олишига йўл қўймаслик ва кейинчалик ўйинни бироз ёпиқроқ ташкил этиб, ҳимоядан ҳаракат қилиш ҳамда қарши ҳужумларга урғу беришни режалаштирган эдик.
Биз рақиб жамоа ҳам, бош мураббий ҳам интервьюларида доимо ўтиш фазаларида кучли эканини, майдонда бўшлиқ пайдо бўлса, ана шу бўшлиқлардан фойдаланиб ҳужум қилишни яхши кўришини таъкидлашини биламиз.
Бугунги иккинчи голда ҳам айнан шундай бўлди. Тўпни йўқотдик, марказда вазиятни тўғри баҳолай олмадик, курашда ютқаздик ва натижада иккинчи голни ўтказиб юбордик.
Шунинг учун асосий вазифа — дастлабки 20 дақиқани жуда интизомли ўтказиш эди. Айтганимдек, буни уддаладик. Биринчи 20 дақиқада, менинг фикримча, ўйинни етарлича яхши назорат қилдик ва вазиятлар ҳам яратдик.
Афсуски, 20 дақиқадан кейин негадир шошила бошладик, асабий ўйинга ўтиб кетдик. Бу эса умуман олганда, дарвозамизга ўтказиб юборишимиз шарт бўлмаган голга олиб келди. Иккинчи голдан кейин эса дарҳол барча куч билан олдинга отилиб, «шашка яланғоч» ҳужум қилишга ҳаракат қилмаслик, аввал ўйинни назоратда ушлаш керак эди. Лекин бу ҳам амалга ошмади.
Яна айтаман, рақиб иккинчи голни ҳам тезда урди ва шундан кейин ўйин янада очиқ тус олди. Бу эса биз учун унчалик қулай эмасди. Ҳа, икки голни қайтаришга муваффақ бўлдик. Лекин яна бир бор айтаман, эҳтимол, бугун бизнинг кунимиз эмас эди. Кўплаб вазиятлар яратдик, аммо улардан фойдалана олмадик. Шундай ҳам бўлиб туради, бундан қочиб қутулиб бўлмайди. Энди ҳаёт давом этади. Уйдаги навбатдаги ўйинга тайёргарликни давом эттирамиз.
- Шундай таассурот қолдики, кўплаб ҳужумларни дарвозабон орқали бошлаяпсизлар. Бугунги автогол ҳам шунинг оқибати бўлдими?
- Йўқ. Бизда аниқ режа бор. Режаларимиздан бири — агар рақиб юқори прессинг билан ўйнаса, дарвозабон орқали ўйнаб, уларнинг босимини бузишга ҳаракат қилиш. Албатта, тушунаман, бугунги автоголда ҳеч қандай прессинг бўлмаган. Бу нима билан боғлиқлигини билмайман. Менинг назаримда, бу ўтказиб юборишимиз шарт бўлмаган гол эди. Умуман олганда ҳа, айрим эпизодларда рақиб прессинг қилаётган бўлса, дарвозабон орқали ўйнашга ҳаракат қиламиз. Лекин бу вазиятда бундай ҳолат бўлмаган. Жамоада айтишни истамайдиган, лекин афсуски, ўзингиз ҳам кўриб турган айрим муаммолар бор. Яна ўша ҳолат: бир ўйинда жароҳат, яна бошқа ўйинда четлатиш. Шунинг учун таркибимиз барқарор бўлмаяпти, доим ротация қилишга мажбур бўляпмиз.
Ҳар бир ўйинда камида икки-уч, баъзида эса тўрт-беш нафар футболчини йўқотяпмиз. Шунинг учун кейинги ўйинни ҳам яна таркибдаги ўзгаришлар билан бошлашимизга тўғри келади. Ҳали вақт бор, ўйлаб кўрамиз», - дея Хомяковнинг сўзларини келтиради Tribuna.uz мухбири.
