22 ёшли Зейнеп Местан «Тургутлуспор» эркаклар жамоасининг бош мураббийи этиб тайинланди. Бу ҳақда клуб матбуот хизмати хабар берди.
Местан ушбу лавозимни эгаллаган клуб тарихидаги илк аёл мураббий бўлди. Клуб президенти Йилмаз Генчтуркнинг сўзларига кўра, мутахассис ўз лойиҳаси ва мураббийлар штаби билан ўтказилган маслаҳатлашувлардан сўнг танланган.
Местан 2004 йил 30 июл куни Измирда туғилган. У футболчилик фаолиятини 2019 йилда бошлаган ва «Каршияка», «Беледиеспор», «Борнова Хитап Спор» каби жамоаларда тўп тепган. Кейинчалик мураббийлик фаолиятига эътибор қаратиш мақсадида футболчилик фаолиятини эрта якунлаган.
Янги бош мураббий Европада Пеп Гвардиолани, Туркияда эса Серген Ялчинни ўзига намуна сифатида кўришини таъкидлади. Местаннинг узоқ муддатли мақсади — беш йил ичида «Тургутлуспор»ни Туркиянинг иккинчи даражали лигасига олиб чиқиш.
Айни пайтда «Тургутлуспор» ҳаваскорлар даражасида иштирок этмоқда.
