«Ливерпул» ҳужумчиси Муҳаммад Салоҳ Чемпионлар Лигаси доирасида «Атлетико»га қарши кечган ўйинда ўзига хос натижа қайд этди.
Учрашувнинг 4-дақиқасида мисрлик футболчи Эндрю Робертсонга ассистентлик қилган бўлса, 6-дақиқада ўзи гол урди. Optaнинг қайд этишича, Салоҳ Чемпионлар Лигаси ўйинининг дастлабки 6 дақиқасида гол урган ва голли узатмани амалга оширган Премиер-лига клублари тарихидаги илк футболчига айланди.
«Қизиллар»нинг 33 ёшли юлдузи ҳисобида турнирнинг 89 учрашувида жами 48 та гол мавжуд. Футболчи 2017 йилдан бери «Ливерпул» шарафини ҳимоя қилиб келмоқда.
Турнирнинг иккинчи турида Англия клуби «Галатасарой» меҳмони бўлади. Беллашув 30 сентябрга белгиланган.
