«Радник» устози Tribuna.uz га: «Шукуровни жамоамизга ўтиши Сербия учун катта сюрприз бўлди»

Яқинда Ўзбекистон миллий жамоаси аъзоси, тажрибали футболчи Отабек Шукуров Сербия чемпионатида иштирок этувчи – «Радник» билан шартнома имзолади.

Албатта, ушбу хабар кўпчиликни ҳайрон қолдирган бўлиши табиий. Чунки бу кутилмаган янгилик бўлди. Эндиликда Шукуров фаолиятини «Радник»да давом эттиради.

Биз эса ушбу клуб бош мураббийи Зоран Рендулич билан алоқа ўрнатдик. Ўз навбатида «Радник» устози Tribuna.uz учун бироз вақт ажратди.

- Жаноб Рендулич, сизга Ўзбекистондан безовта қиляпман. Нима сабабдан қўнғироқ қилаётганимни аллақачон тахмин қилгандирсиз. Гап Отабек Шукуров ҳақида кетмоқда. Ростини айтганда, бу футболчини ўз жамоангизга қўшганингиздан кейин Ўзбекистондан сизга қўнғироқлар бўлишини кутмаган бўлсангиз керак?

- Отабекнинг мамлакатингизда жуда машҳур эканини тушунаман, шунинг учун бу суҳбатга сабаб бўлган мавзуни ҳам яхши англаяпман.

- Ростини айтсак, Шукуровнинг Сербия, хусусан, «Радник»ка ўтишини биз ҳам кутмагандик. Умуман, бу трансфер қандай амалга ошди?

- Трансфер ойнаси ёпилганидан кейин бир футболчини таклиф қилиш имконияти пайдо бўлди. У эркин агент мақомида эди, қолаверса, унинг агенти бизнинг ҳудуддан бўлгани учун алоқаларни йўлга қўйиш анча осон кечди.

- Одатда Сербия чемпионатидан Ўзбекистонга кўплаб футболчилар келади. Аммо ўзбек футболчиларининг Сербияга бориб ўйнаши унчалик кўп учрамайди. Сизнингча, бунинг сабаби нимада?

- Сербиялик кўплаб футболчилар мамлакатингизда ўзидан яхши из қолдирган ва кейинги авлод футболчилари учун эшикларни очиб берган.

- Отабек Шукуровни биринчи марта қачон кўргансиз ва уни жамоангизга таклиф қилиш ташаббуси қачон пайдо бўлган?

- Мен уни трансфердан икки ҳафтача олдин биринчи марта кўрдим. Футболчиларни жалб қилиш билан клубнинг скаутлик хизмати ва спорт директори шуғулланади. Албатта, жаҳон чемпионатида иштирок этган, катта тажрибага эга футболчининг жамоага қўшилишига мен ҳам рози бўлдим.

- Биз Шукуровнинг етарлича кучли футболчи эканини биламиз ва табиийки, унинг молиявий талаблари ҳам даражасига мос. «Радник» футболчининг молиявий талабларини қондиришда қийинчиликларга дуч келмадими?

- Молиявий масалалардан хабардор эмасман, бу менинг вазифаларим доирасига кирмайди. Аммо «Радник» Шукуровни ўз сафига қўша олган бўлса, демак, клуб барча йўналишларда анча ўсган.

- Нега айнан Шукуровни танладингиз? Бошқа ўзбек футболчиларини ҳам кўриб чиқдингизми?

- Бошқа футболчиларни муҳокама қилмадик ва кўриб ҳам чиқмадик.

- Айни пайтда Ўзбекистон чемпионатида тўп тепаётган сербиялик футболчилардан қайсилари сизга яхши таниш? Уларнинг бирортаси билан алоқани сақлаб турибсизми?

- Ҳозирча у ердаги ҳеч бир футболчи билан алоқам йўқ. Мен ўзим ҳам фаолиятимни анча олдин якунлаганман, ҳозир у ерда мендан анча ёш футболчилар тўп тепмоқда.

- Отабек Шукуровнинг «Радник»ка ўтишига Сербияда қандай муносабат билдирилди?

- Бундай жиддий резюмега эга футболчининг «Радник»ка ўтиши Сербия учун катта сюрприз бўлди.

- Энди ўзбек мухлислари ҳам Шукуровнинг янги жамоасига катта қизиқиш билдира бошлади. Бу ўз навбатида, «Радник» учун ҳам ўзига хос яхши реклама бўлмоқда. Сиз ҳам шундай деб ҳисоблайсизми?

- Албатта, ўз миллий терма жамоасида 92 та учрашув ўтказган футболчининг жамоамиз сафига қўшилиши «Радник»нинг нуфузи ва рейтингига ҳам ижобий таъсир кўрсатади.

- «Радник»нинг чемпионатдаги мақсадлари қандай? «Црвена Звезда»ни биз яхши биламиз — клуб ҳозир ҳам пешқадамлик қилмоқда. «Радник» эса айни пайтда 14 очко билан 7-ўринда бормоқда. Мавсум якунига қадар жамоа олдига қандай вазифалар қўйилган?

- «Радник»нинг бу мавсумдаги мақсади — ҳозирги ўрнимизни сақлаб қолиш. Аммо юқорироқ натижа учун имконият пайдо бўлса, албатта, ундан фойдаланиш учун курашамиз.