Узоқ танаффусдан кейин Суперлига чемпионлигини қўлга киритган «Нефтчи» ҳамда мамлакат кубогининг амалдаги ғолиби «Пахтакор» ўртасидаги Суперкубок ўйини Андижонда ўтказилади. Бу ҳақда ЎзПФЛ матбуот хизмати хабар берди.
«Тақвим режага кўра, Суперкубок беллашуви 15 март куни бўлиб ўтади. Сўнгги йилларда Лига Суперкубок беллашувини май ойида ўтказиб келаётганди. Бироқ мамлакат бош жамоаси жаҳон чемпионатида иштирок этадиган мавсумда мухлислар учун аҳамиятли бўлган супер учрашув март ойига режалаштирилди.
Суперкубок ўйинига Олмалиқ ёки Наманган шаҳридаги стадионлар ҳам мезбонлик қилиши мумкин эди. Бироқ ОКМК ва «Марказий» стадионларида таъмирлаш ишлари давом этаётган бўлиб, уларнинг қайта иш бошлаш саналари аниқ эмас. Шундан келиб чиққан ҳолда, Андижондаги «Бобур арена» варианти энг мақбул вариант деб топилди.
«Бобур арена» кетма-кет иккинчи мавсум катта футбол учрашувига мезбонлик қилади. Бир йил муқаддам Ўзбекистон кубогининг финал учрашуви тарихда илк бор Андижонда ўтказилганди.
Қайд этиш лозим, вилоят ҳозирга қадар Суперкубок ўйинига мезбонлик қилмаган ва мазкур воқелик ҳам «Бобур арена» учун биринчиси ҳисобланади», — дейилади хабарда.
