КОНКАКАФ Шимолий ва Марказий Америка, шунингдек, Кариб ҳавзаси мамлакатлари миллий жамоалари ўртасидаги асосий мусобақа — Олтин кубок формати ўзгарганини эълон қилди.
Гуруҳ босқичида аввалги 4 та гуруҳда 4 тадан жамоа ўрнига 8 тадан миллий жамоа иштирок этадиган 2 та гуруҳ шакллантирилади. Ҳар бир жамоа аввалги 3 та ўйин ўрнига 4 та учрашув ўтказади.
«Мухлисларимиз минтақамизнинг энг яхши жамоалари ўзаро рақобатлашишини кўришни исташади. Янги формат мусобақанинг дастлабки босқичларидаёқ бундай учрашувлар учун кўпроқ имконият яратади. Шу билан бирга, ҳар бир ўйин муҳим аҳамиятга эга бўлади: жамоалар куч жиҳатидан мувозанатли рақибларга қарши майдонга тушади ва плей-оффга чиқиш учун курашади. Бу Олтин кубокни биринчи ўйиндан финалга қадар янада рақобатбардош ва томошабоп қилади, деб ҳисоблаймиз», — деди КОНКАКАФ президенти Виктор Монталяни.
Олтин кубок ҳар икки йилда бир марта ўтказилади. Мусобақада 16 та миллий жамоа иштирок этади: улардан 15 таси КОНКАКАФ Миллатлар лигаси орқали йўлланма олади, яна бир ўрин эса таклиф этилган жамоага берилади.
Мусобақада энг кўп — 10 марта Мексика ғолиб бўлган. АҚШ ҳисобида 7 та, Канада ҳисобида эса 1 та чемпионлик бор. Навбатдаги турнир 2027 йилда бўлиб ўтади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади