Қирғизистон бош мураббийи: «Японияда журналистлар мендан Ўзбекистон хақида кўп сўрашди»

Япониядаги Осиё ўйинларининг футбол мусобақасида Равшан Ҳайдаров бошчилигидаги терма жамоамиз ярим финалда японларга ютқазди ва учинчи ўрин учун баҳс олиб боради.

Шунингдек, ён қўшнимиз – Қирғизистон олимпия терма жамоаси ҳам ушбу мусобақада қатнашиб, гуруҳда Япония, Таиланд ва Гонконгга қарши беллашиб, бир ғалаба ва икки мағлубият қайд этди.

Қирғизистон бош мураббийи Нодир Мамадалиевга ҳам бизнинг футболимиз бегона эмас ва улар ҳам вакилларимизга мухлислик қилишмоқда. Tribuna.uz журналисти эса Мамадалиев билан суҳбатлашди.

- Қирғизистон олимпия терма жамоасининг Осиё ўйинларидаги иштирокига қандай баҳо берасиз? Гуруҳдан Таиланд, Япония ва Гонконг билан куч синашди.

- Турнир бошланишига 10 кун қолганида терма жамоани қабул қилиб олдим. Таркиблар аниқ бўлиб улгурганди ва биз бошқа ўйинчиларни қўша олмадик. Биз айтилган таркиб билан бордик. Чунки олимпия терма жамоанинг олдинги бош мураббийи Қирғизистон миллий жамоаси устозига айланганди. Мен эса унинг ўрнига U23 жамоасига бош мураббий бўлдим. Албатта, Қирғизистон ўз ўлкам бўлгани учун бу менга катта чақирув эди ва мамлакат шарафини ҳимоя қилиш катта шараф, шу билан бирга катта масъулият ҳамдир. Айнан масъулиятни сездим. Яхши натижа бўлмаса ҳам менга кўп босим бўлишини билардим. Лекин иккинчи томондан бу ўз мамлакатим ва мен учун ҳам янги чақирув эди.

Осиё ўйинларига бориб яхши ўйин кўрсатдик. Биринчи учрашувни Таиландга қарши ўтказдик. 2:0 ҳисобида ғалаба қозонаётиб, 70-дақиқадан кейин учта гол ўтказиб юбориб, ютқазиб қўйдик. Бундан ҳам яхши хулоса чиқардик. Иккинчи турда эса Япония билан ютиш ўйинини ўйнадик. Ўзбекистоннинг Японияга қарши учрашувини ҳам кўрдикки, японларга қарши ҳимоявий ўйин кўрсатиб бўлмайди. Агар ҳимоявий футбол ўйнасангиз, Япония ўзини бемалол яхши ҳис қилади. Ўзбекистон биринчи бўлимда прессинг қилиб яхши ўйнади. Иккинчи таймда эса ҳимоявий футбол ўйнагани учун японияликлар ўзларини худди сувдаги балиқдек сезиб, кўп вазиятлар яратди. Биз ҳам худди шу нарсага дучор бўлдик. Биринчи бўлимда кўпроқ олдинга ўйнадик. Иккинчи таймда эса кўпроқ голлар ўтказиб юбордик. Прессингга боришга кучимиз етмасдан орқароқда ўйнаганимиз учун рақиб голлар урди. Учинчи ўйинда Гонконг билан беллашдик. Бу ҳам яхши жамоа. Таркибида учта ёши катта футболчилари бор. Ўша охирги ўйинда ютдик. Раҳбарият ишимиздан рози бўлди. Чунки биринчи учрашувда ҳам яхши ўйин кўрсатгандик. Фақат ментал томонлама ютқазиб қўйдик. Ўйлайманки, кейинги сафар ҳам клубда, ҳам терма жамоада яхши натижалар кўрсата оламиз.

- Ўзбекистон олимпия жамоасининг ўйинларини кузатдингиз ва қандай баҳо берасиз?

- Албатта, ўйинларини кўрдим. Бу Ўзбекистон U23 эмас, U21 терма жамоаси эди. Японияда журналистлар ҳам менда кўп сўрашдики, яъни, қўшни давлат Ўзбекистонни жаҳон чемпионатига чиққани сизларга ҳам қўшимча «стимул» бердими, сизларга қанақа таъсир қиляпти, дейишди. Албатта, Ўзбекистон футболчиларини кўрдик, видеолардаги ўйинларини кузатдик, ҳар бир рақибга қарши қўрқмасдан ўйнай олишларини кўрсатиб беришди. Буни ўзимизни йигитларга ҳам кўрсатдик. Албатта, Ўзбекистон Марказий Осиё жамоаларига яхши қадам ташлади. Биз ҳам шарқий Осиё жамоаларига, Япониями, Жанубий Корея бўладими, ўзимизга ишониб, руҳий томондан тайёр бўлсак, Марказий Осиёга хос бўлган курашувчан характерни кўрсата олсак, яхши бўлади. Буни Ўзбекистон яққол кўрсатди. Агар Ўзбекистон ярим финалда Японияга дуч келмасдан Корея билан ўйнаганда албатта уларни ютарди ва финалда японларга қарши майдонга тушарди. Яна шуни ҳам унутмаслик керакки, у ерда ҳаво иқлими нам. Футболчиларимиз шунинг эвазига иккинчи таймда бунга чидай олмадилар. Лекин Ўзбекистонда шундай иқлимда ҳам Япония билан бемалол ўйнай олади.

- Учинчи ўрин учун терма жамоамиз Хитой билан баҳс олиб боради. Имкониятни қандай баҳолаяпсиз?

- Хитойни таҳлил қилганмиз, чунки ўзимиз ҳам ўйлаганмиз, агар иккинчи ўрин билан чиқсак, хитойликларга қарши ўйнашимизни билардик. Хитой уч нафар ёши катта ўйинчиларни олган ва 3-5-2 тактикасида ҳаракат қилади. Ўзбекистон жисмоний ҳолатини яхшиласа, нам ҳавода тиклана олса бемалол ўйнайди. Эрон ҳам гуруҳда қолиб кетди, Саудия ҳам. Ўша иқлимга Осиёнинг нариги қитъасидаги жамоалар кўпроқ мослашгани учун бемалол ўйнашди. Агар шу муаммони ҳал қилиб, Японияга қарши биринчи бўлимда кўрсатган ўйинини тўлиқ намойиш қилса, Ўзбекистон рақибини бемалол ютади, муаммо бўлмайди.