«Фенербаҳче» клуби «Галатасарой»дан учралган мағлубиятдан сўнг Доменико Тедескони ишдан бўшатди.
Германиялик мутахассис бошқарган жамоа Истанбул дербисида принципиал рақибига йирик ҳисобда (0:3) ютқазгач, 31 та ўйиндан кейин турнир жадвалида 2-ўринни эгаллаб турибди. Улар мавсум тугашига 3 тур қолганида пешқадам «Галатасарой»дан 7 очкога орқада қолмоқда, яъни чемпионлик учун имконият деярли қолмади.
«Фенербаҳче» директорлар кенгаши Тедеско ва унинг мураббийлар штаби, шунингдек, клуб спорт директори Девин Ўзекни ишдан бўшатишга қарор қилди. Қолган ўйинларда жамоани Зеки Мурат Геле бошқаради.
Тедеско 2025 йил сентябр ойи бошида Жозе Моуринио ўрнига Истанбул клуби бош мураббийи этиб тайинланганди. У клуб билан бирга Туркия суперкубогини қўлга киритди, финалда «Галатасарой» 2:0 ҳисобида мағлуб этилганди. Доменико жамоа билан жами 45 та ўйин ўтказди: 26 ғалаба, 12 дуранг, 7 мағлубият, тўплар фарқи — 87:46, ҳар бир ўйинда ўртача 2 очко.
