Испания миллий жамоаси ва «Манчестер Сити» клубининг собиқ яримҳимоячиси Давид Силва профессионал фаолиятини тиклаганидан кейинги дастлабки учрашувида гол уришга муваффақ бўлди.
40 ёшли футболчи Ҳонконг чемпионатида «Шатин» сафида «Гонконг Рейнжерс»га қарши майдонга тушди. 1:1 ҳисобида якунланган баҳсда Силва пеналтини аниқ амалга ошириб, жамоасининг ягона голига муаллифлик қилди.
Эслатиб ўтамиз, испаниялик футболчи бир ой аввал «Шатин» билан қисқа муддатли шартнома имзолаб, катта футболга қайтишга қарор қилганди. Тажрибали яримҳимоячи футболга қайтишини гол билан бошлади.
Силва фаолияти давомида «Валенсия», «Манчестер Сити» ва «Реал Сосиедад» каби клубларда тўп тепган. Шунингдек, у Испания миллий жамоаси шарафини ҳимоя қилган.
Маълумот ўрнида, Давид 2023 йилнинг ёзида «Реал Сосиедад» сафида олган жиддий тизза жароҳатидан сўнг футболчилик фаолиятини якунлаган эди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади