Брозович — «Ас Садд» футболчиси

Хорватиялик яримҳимоячи Марсело Брозович «Ас Садд» футболчисига айланди. Бу ҳақда Қатар клуби матбуот хизмати хабар берди.

33 ёшли футболчи билан тузилган шартнома 2027 йил ёзига қадар амал қилади. Брозович Қатар клубига эркин агент сифатида қўшилди. Унинг сўнгги клуби Саудия Арабистонининг «Ан Наср» жамоаси эди. У ўтган мавсумда риёдликлар билан мамлакат чемпионлигини қўлга киритган.

Брозович 2015 йилдан 2023 йилгача тўп тепган «Интер» клуби сафида ўйнаб, Италия чемпиони бўлган, мамлакат кубоги ва суперкубонида икки мартадан ғолиб чиққан. Шунингдек, 2022/23 мавсумда Чемпионлар лигаси финалигача етиб борган.

Яримҳимоячи Хорватия миллий жамоаси таркибида 2018 йил Россияда бўлиб ўтган Жаҳон чемпионатида кумуш медал, 2022 йил Қатардаги мундиалда эса бронза медал соҳиби бўлган.