ФИФА ЖЧ-2026даги иштирок учун футболчиларнинг клубларига бу йил жами 335 миллион долларни тақсимлаб беради.
Ташкилотнинг жаҳон бўйлаб футбол клубларини қўллаб-қувватлашга қаратилган «Клублар учун имтиёзлар дастури» доирасида ЖЧ-2026га миллий жамоалар сафида мундиалга юборилган футболчилар учун ҳар бир клуб белгиланган қийматда маблағга эга бўлади.
«O’zbekiston24» телеканали хабарида қайд этилишича, Суперлига клубларидан чақирув олган 16 нафар футболчи учун ўзбек клубларига ФИФА томонидан гуруҳ босқичи учун жами 4 млн 752 минг АҚШ доллари тўланади.
Шундан энг кўп маблағ миллий жамоага 5 нафар футболчисини юборган «Пахтакор» клуби олади – 1 млн 485 минг доллар. Бу ҳозирги қийматда 17 млрд 820 миллион сўм деганидир.
«Нефтчи» клуби миллий жамоага таклиф этилган 3 ўйинчиси учун 891 минг доллар олиши қайд этилган.
Фабио Каннаваро «Динамо» ва «Насаф»дан икки нафардан ўйинчи чақиргани учун ФИФА бу жамоалар ҳисоб рақамига турнир якунидан кейин энг камида 594 минг доллар ёки ўзбек сўмида 7 миллиард 128 миллион сўм тўлов қилиши кўрсатилган.
«Бухоро», «Навбаҳор», «Сурхон» клублари эса бир нафардан ўйинчиси учун 297 минг АҚШ долларидан олади. Бу ҳозирги қийматда 3,5 миллиард сўмдан кўпроқ маблағдир.
Қайд этиш жоиз, ФИФА ЖЧ-2026 учун чақирув олган футболчиларнинг ФИФА кунларидаги йиғиндан бошлаб турнирдаги ҳар бир куни учун ҳисоб-китоб қилади. Юқоридаги маблағ футболчиларнинг минимум гуруҳ босқичи якунигача миллий жамоа сафида бўлиши инобатга олиниб ҳисобланган. Ўзбекистон миллий жамоаси гуруҳ босқичидан плей-оффга йўлланма олса, клубларга тўланадиган тўлов миқдори ошишда давом этади.
Эслатиб ўтамиз, ФИФА ЖЧ-2022 учун клубларга жами 209 миллион долларни (ҳар бир кун учун – 10 950 доллар) тақсимлаган бўлса, ЖЧ-2026да бу жами маблағ 335 миллион долларни ташкил этади.
