Germaniya Kubogining 1/16 final bosqichi doirasida «Borussiya D» va «Verder» jamoalari o‘zaro bellashdi. Dortmunddagi «Signal Iduna Park» stadionida o‘tgan bahs mezbonlarning 3:2 hisobidagi g‘alabasi bilan yakunlandi.
Uchrashuvning 6-daqiqasida mezbonlar hujumchisi Seru Girassi Yulian Ryuersonning uzatmasidan keyin hisobni ochdi. 17-daqiqada esa Karni Chukvuemeka Job Bellinghemning golli uzatmasidan foydalanib, dortmundliklarning ustunligini ikki karra oshirdi.
Ikkinchi bo‘limning o‘rtalarida «Verder» futbolchilari Niklas Fyullkrugning dubli evaziga hisobni tenglashtirishga muvaffaq bo‘ldi. Nemis hujumchisi 65-daqiqada birinchi golini urgan bo‘lsa, 68-daqiqada Yuri Regerning uzatmasidan keyin yana bir bor raqib darvozasini ishg‘ol qildi — 2:2.
90+3-daqiqada «Borussiya»ning avstriyalik yarim himoyachisi Marsel Sabitser g‘alaba golini kiritdi.
Ushbu g‘alaba orqali «asalarilar» turnirning 1/8 final bosqichiga yo‘l oldi. «Verder» esa musobaqadagi yurishini shu bosqichda tugatdi.
Germaniya kubogi. 1/16 final
Borussiya D – Verder 3:2
Gollar: Girassi 6, Chukvuemeka 17, Sabitser 90+3 – Fyullkrug 65, 68
