Мадриднинг «Атлетико» клуби бош мураббийи Диего Симеоне ҳужумчи Жонатан Дэвид билан илк машғулотлардан кейин фикрлари билан ўртоқлашди.
«Биз унинг «Лилл»даги ҳолатидаги сингари футболчи керак. У билан гаплашдик, унинг бизга керакли, ёрдам бера оладиган хислатлари мавжуд. У имкон қадар тезроқ жамоага мослашиб олиши биз учун муҳим. У келганига кўп бўлмади ва ҳали адаптация жараёни давом этмоқда. Биз унинг шижоати ва жуда ғайратли эканлигини кўряпмиз. Умид қиламизки, у майдонда бизга ўзи хоҳлаган ва биз ундан кутаётган нарсаларни бера олади», - дея Симеоне сўзларидан иқтибос келтирди AS.
Эслатиб ўтамиз, Дэвид Туриннинг «Ювентус» клубидан «Атлетико» сафига ёзги трансфер ойнаси вақтида келиб қўшилди. Форвард мадридликлар сафида ижара ҳуқуқи асосида ҳаракат қилади, ўз навбатида испанлар уни сотиб олиш имкониятига эга.
