Мартин Боаке: «Биз ўз ўйинимизни намойиш қилишимиз керак. Муҳими шу»

«Андижон»нинг италиялик ҳужумчиси Мартин Боаке ўтган турда қаҳрамонга айланди. У «Бобур арена»да «Хоразм» жамоасига қарши бўлиб ўтган учрашувда захирадан майдонга тушиб рақиб дарвозасини ишғол қилди ва унинг ягона голи «Бургутлар»га уч очко келтирди.

Эндиликда у жамоаси билан «Пахтакор»га қарши ўтадиган навбатдаги муҳим беллашувга жиддий ҳозирлик кўряпти. Мухлислар эса ушбу ҳужумчидан яна голлар кутишлари табиий.

Боаке ўтган турдаги голи ва бўлажак ўйин борасида бир қатор саволларга жавоб қайтарди.

- Мартин, ҳозирги вақтда «Пахтакор»га қарши муҳим учрашувга тайёргарлик жараёни қандай кечмоқда?

- Биласизми, биз ҳар доимгидек, яхши ва қаттиқ меҳнат қиляпмиз. Ўйинга жиддий тайёргарлик кўряпмиз.

- Уч учрашувлик дисквалификациядан сўнг «Хоразм»га қарши баҳсда майдонга қайтдингиз ва жамоага ғалабани тақдим этган ягона голни урдингиз. Захирадан майдонга тушаётганингизда гол уришингизни ҳис қилганмидингиз?

- Мен яхши ўйнаш ва жамоага ёрдам беришга эътибор қаратдим. Худога шукр, гол уриш имконияти берилди ва мен ундан фойдаландим. Албатта, жамоамнинг ғалабасига ҳисса қўшганимдан жуда хурсандман.

- Дисквалификация пайтида мотивациянгиз ва ғалабага бўлган интилишингиз янада кучайдими?

- Янада яхшироқ ҳаракат қилиш учун ўзимни рағбатлантиряпман. Чунки қизил карточка олиб, хато қилдим. Шунинг учун буни доим ёдда тутиб, бундан кейин бундай хатоларни такрорламасликка ва ҳар доим яхшироқ ўйнашга ҳаракат қиламан.

- Ўзбекистон чемпионатида энг кучли ҳужумчи ким, деб ҳисоблайсиз?

- Айтишим мумкинки, бу лигадаги барча ҳужумчилар яхши. Бирортасини ажратиб кўрсатмайман.

- Чемпионатимизда сиз учун ноқулай ҳимоячилар борми?

- Рости, билмайман (кулади).

- «Пахтакор»га қарши учрашувдан нималар кутяпсиз? Яна бир гол уришингизга қанчалик ишончингиз комил?

- Келинг, Худо бизга нима беришини кўрамиз. Лекин биз ўз ўйинимизни намойиш қилишимиз керак. Мен учун энг муҳими шу.

- Айни пайтда ҳисобингизда учта гол бор. Чемпионат якунига қадар нечта гол уришни хоҳлардингиз?

- Умид қиламанки, ҳали кўп-кўп голлар ураман.