Ҳуқуқий жихатдан «Манчестер Юнайтед»га тегишли бўлган ҳужумчи Маркус Рэшфорд «Барселона»да қолиши мумкин. Бу ҳақда Daily Mail нашри хабар берди.
Манбага кўра, Каталония клуби тахминан 30 миллион еврони ташкил этувчи англиялик футболчини сотиб олиш бандини фаоллаштирмоқчи эмас.
Бунинг ўрнига «кўк-анорранглилар» ҳужумчининг трансфери учун тахминан 12,5 миллион евро тўлашга тайёр.
Маълумот учун, Маркус 2025 йилнинг ёзидан буён «Барселона» сафида ижара асосида тўп тепмоқда. Унинг «Манчестер Юнайтед» билан шартномаси 2028 йилнинг 30 июнигача мўлжалланган.
Якунланган мавсумда у «Барселона» сафида барча турнирлар доирасида 49 та ўйин ўтказиб, 14 та гол урди ва 14 та голли узатмани амалга оширди. Transfermarkt портали Рэшфордни 40 миллион еврога баҳоламоқда.
