Марио Балотелли Италия футболида ёш иқтидорлар етишиб чиқишига гаджетлар ва болалар тарбиясидаги ўзгаришлар салбий таъсир кўрсатаётганини таъкидлади.
«Менимча, муаммолар жуда оддий. Мен техник эмас, кундалик ҳаёт ва Италияда кўраётганларимдан келиб чиқиб, амалий тушунтириш беришни афзал кўраман.
Биз кичиклигимизда соатлаб футбол ўйнардик. Онам тўпни кўришнинг иложи қолмайдиган даражада қоронғи тушгунча кўчада қолганим учун жаҳли чиқарди. Ҳозир эса Брешия каби шаҳарларда сайр қилсам, парклар бўм-бўш. Буни Италиянинг бошқа шаҳарларида ҳам кўриш мумкин.
Компютерлар, телефонлар ва плейстейшн кўп нарсани бузди. Энг аввало, ота-оналарнинг фикрлаши ўзгарди. Бугун етти ёшли бола ҳар уч кунда икки соат футбол ўйнаши мумкин. Бизда ҳам ташкиллаштирилган машғулотлар бўларди, лекин бундан ташқари ҳар куни уч соат паркда футбол ўйнардик. Биз шунчаки кўнгилхушлик қиляпмиз, деб ўйлардик, аслида эса бу қўшимча машғулот эди.
Мен иқтидорлар кўчаларда ва паркларда туғилганига чиндан ҳам ишонаман. Кўп футбол ўйнардингиз, кўп нарсани ўрганардингиз ва ўзингизни ёши каттароқ болаларга қарши синаб кўрардингиз. Агар яхши ўйнасангиз, тенгдошларингиз билан ўйнашингизга рухсат беришмас, катталар билан ўйнашга юборишарди. Бу синовлар узоқ муддатда менга жуда катта фойда берди. Ёши мендан катта футболчилар билан ўйнаш фаолиятимдаги энг муҳим жиҳатлардан бири бўлган.
Бугун болалар телефонда ўтиради. Роналдинионинг видеоларини кўриб, ўзини у каби ҳис қилади. Мен эса Роналдога ўхшашимни ҳис қилардим, чунки унинг финтларини паркда ҳақиқатан ҳам такрорлай олардим. Булар мутлақо бошқа нарсалар», — деди Балотелли.
