Moriyasu: «Yaponiyaliklardan uzr so‘rayman. Javobgarlikni o‘z zimmasiga olaman»

Yaponiya milliy jamoasi bosh murabbiyi Hajime Moriyasu JCH-2026 1/16 finalidan oʻrin olgan Braziliya (1:2) bilan oʻyindan soʻng oʻz fikrlarini bildirdi.

«Biz yaponiyaliklar uchun g‘alaba qozona olmaganimizdan chuqur afsusdaman. Bosh murabbiy sifatida mas’uliyatni o‘z zimmasiga olaman va barchadan uzr so‘rayman.

Shuningdek, Hyustondagi stadionga kelib, bizni qo‘llab-quvvatlagan ko‘p sonli yaponiyalik muxlislarga minnatdorchilik bildiraman. Bundan tashqari, Yaponiyada ham, dunyoning turli burchaklarida ham ko‘pchilik tun yarmida televizor yoki internet orqali o‘yinni kuzatib, bizga dalda berganlarni yaxshi bilaman.

Musobaqadagi ishtirokimizni aynan shu yerda yakunlash juda og‘ir. Ammo futbolchilar bu o‘yinda bor kuch va imkoniyatlarini ishga solishdi. Ular bu kungacha bo‘lgan tayyorgarlik jarayonida har bir kunni qadrlab, ulkan fidoyilik bilan mehnat qilishdi. Murabbiylar shtabi va butun jamoa ham shu yo‘l davomida beqiyos sadoqat va jonbozlik ko‘rsatdi.

Qo‘limizdan kelgan barcha ishni qildik. Hozir chuqur tushkunlikka tushgan bo‘lsak-da, bu natijani qabul qilib, kelajakda yanada yaxshiroq bo‘lib qaytish uchun undan kuch va rag‘bat olamiz», — deya Moriyasuning so‘zlarini keltiradi Globo Esporte.