«Bornmut» bosh murabbiyi Andoni Iraola «Manchester Siti»ga qarshi o‘yindan keyin Mikel Artetadan sovg‘a kutayotgani haqida hazil tariqasida gapirdi.
37-tur doirasidagi bahs 1:1 hisobida yakunlandi va aynan shu natija «Arsenal»ga muddatidan avval Angliya chempionligini olib keldi.
O‘yindan keyin jurnalistlar Iraoladan Arteta unga sovg‘a yuborishini kutayotgani haqida so‘rashdi.
«Biror narsa olish ajoyib bo‘lardi! Men hatto telefonimni ham tekshirmadim — ehtimol, kamida bitta xabar yoki shunga o‘xshash nimadir kelgandir. Ammo bu chempionlik aynan ushbu o‘yin sabab emas. Ular baribir masalani o‘zlari hal qilgan bo‘lardi», — dedi mutaxassis.
Eslatib o‘tamiz, mavsum tugashiga bir tur qolganida «Arsenal» 82 ochko bilan APL jadvalida peshqadam bo‘lib turibdi.
«Manchester Siti» esa 78 ochko bilan ikkinchi o‘rinda qolmoqda va matematik jihatdan chempionlik imkoniyatidan mahrum bo‘ldi.
