«Борнмут» бош мураббийи Андони Ираола «Манчестер Сити»га қарши ўйиндан кейин Микел Артетадан совға кутаётгани ҳақида ҳазил тариқасида гапирди.
37-тур доирасидаги баҳс 1:1 ҳисобида якунланди ва айнан шу натижа «Арсенал»га муддатидан аввал Англия чемпионлигини олиб келди.
Ўйиндан кейин журналистлар Ираоладан Артета унга совға юборишини кутаётгани ҳақида сўрашди.
«Бирор нарса олиш ажойиб бўларди! Мен ҳатто телефонимни ҳам текширмадим — эҳтимол, камида битта хабар ёки шунга ўхшаш нимадир келгандир. Аммо бу чемпионлик айнан ушбу ўйин сабаб эмас. Улар барибир масалани ўзлари ҳал қилган бўларди», — деди мутахассис.
Эслатиб ўтамиз, мавсум тугашига бир тур қолганида «Арсенал» 82 очко билан АПЛ жадвалида пешқадам бўлиб турибди.
«Манчестер Сити» эса 78 очко билан иккинчи ўринда қолмоқда ва математик жиҳатдан чемпионлик имкониятидан маҳрум бўлди.
