АПЛ 37-тури доирасидаги баҳс «Бёрнли» - «Манчестер Сити» баҳси 1:1 ҳисобида якунланди ва айнан шу натижа «Арсенал»га муддатидан аввал Англия чемпионлигини олиб келди.
«Шаҳарликлар» устози Пеп Гвардиола жамоа мавсум давомида кўплаб қийинчиликларга дуч келганини, бироқ футболчилар охиригача курашганини таъкидлади.
«Январдан бери биз чиндан ҳам жуда яхши ўйнадик. Кўплаб жароҳатлар ва назоратимиздан ташқаридаги ҳолатлар бўлди. Ушбу мавсумда кўп нарсани ўргандик. Ғалаба қозониш учун жуда кўп очко жамғариш ва устунлик яратиш кераклигини тушундик.
Биз кўплаб оғир дамларни бошдан кечирдик ва бирор марта ҳам таслим бўлмадик. Шу сабаб ҳозир шу ердамиз», — деди Гвардиола матбуот анжуманида.
Шунингдек, мутахассис «Арсенал»ни чемпионлик билан табриклади.
«Арсенал»ни чемпионлик билан табриклайман. Улар чинакамига чемпионликка мос ўйинлар намойиш этди. Артета бунга ҳақли», — деди испаниялик мутахассис.
Мавсум якунига бир тур қолганида «Манчестер Сити» 78 очко билан иккинчи ўринда бормоқда.
82 очко жамғарган «Арсенал» эса Англия чемпионлигини муддатидан олдин расмийлаштирди.
