Мадридликлар яримҳимоячиси Федерико Валверде «Реал Сосиедад» устидан қозонилган 4:1 ҳисобидаги ғалабадан сўнг учрашув ҳақида фикр билдирди. У Килиан Мбаппенинг учта голи ва жамоанинг иккинчи бўлимдаги ўйинини алоҳида таъкидлади.
«Жамоа диққатни жамлаганини, олдинга интилганини кўрдим. Биз жуда яхши ишладик, фақат биринчи голни урганимиздан кейин бироз сабр етишмади ва улар ҳисобни тенглаштирди. Танаффусдаги суҳбат бизга фойда берди, иккинчи бўлим эса ажойиб ўтди», — деди Валверде.
Яримҳимоячи танаффусда асосан прессинг ҳақида гаплашилганини айтди. Унинг сўзларига кўра, рақиб майдонида тўпни қайтариб олиш қийин кечган ва жамоа бу жиҳатни иккинчи бўлимда тузатган.
Мбаппенинг ўйини ҳақида гапирар экан, Валверде франциялик ҳужумчини юқори баҳолади.
«Ажойиб, ҳайратланарли. Биз ундан максимал даражада фойдаланишимиз, гол уриши ва хурсанд бўлиши учун унга тўп етказиб беришимиз керак. Бугун қилган ишларини у йил давомида кўп марта амалга оширади», — деди футболчи.
Маълумот учун, Мбаппе «Реал»нинг «Реал Сосиедад»га қарши баҳсида 40, 60 ва 80 дақиқаларда гол уриб, ҳет-трик қайд этди. Винисиус Жуниор ҳам битта гол урди.
