«Манчестер Сити» ҳужумчиси Эрлинг Ҳоланд АПЛ 33-тур доирасидаги «Арсенал»га қарши ўйин (2:1)дан сўнг ўз таассуротлари билан ўртоқлашди.
«Жуда хурсандман, бу ажойиб ғалаба. Габриэл билан тўқнашувим? Бундай ҳолатлар доим бўлиб туради деб ўйлайман. Қайси биримиз ғолиб бўлганини бошқалар ҳал қилаверсин.
Яна Бернарду Силванинг тўпни қайтарган эпизоди ёдимда қолди. Мен унга айтдим: «Бугун сен Каннаварога ўхшадинг. Ҳиссиётларга берилгим келмайди, аммо Берни, сен ҳар доимгидек ажойибсан».
Чемпионлик кураши? Биз учун ҳар бир ўйин финалга тенг. Интервю тугаши билан тикланиш ва «Бёрнли»га қарши ўйинга тайёргарликка киришаман. Бу ўйин ҳам худди ўтган баҳс ёки «Челси»га қарши беллашув каби муҳим бўлади», — дея Ҳоланднинг сўзларини келтиради Sky Sports.
Ушбу ўйиндан сўнг «Манчестер Сити» 67 очко билан Англия чемпионати турнир жадвалида 2-ўринда бормоқда, «Арсенал» эса 70 очко билан пешқадамлик қиляпти. Таъкидлаш керак, «шаҳарликлар»нинг захирасида яна бир ўйин мавжуд.
