Кейруш Беллингҳэм билан зиддият ҳақида: «Футбол смокинг кийиб, рақсга тушадиганлар учун эмас»

Гана миллий жамоаси бош мураббийи Карлуш Кейруш футбол бўйича Жаҳон чемпионати 2-туридан ўрин олган Англияга (0:0) қарши ўйинда Жуд Беллингҳэм билан юзага келган можаро ҳақида фикр билдирди.

Зиддият иккинчи бўлим охирида англиялик футболчининг Гана ҳимоячиси Жереми Опокуга қарши ишлатган қўпол ҳаракати бўйича португалиялик мутахассис берган танбеҳдан кейин бошланган.

«У ҳақоратли сўзлар ишлатиб, нотўғри муносабат билдирди. Шунинг учун бу воқеа бошланди.

Мен унга подкатдан кейин тинчланишни айтмоқчи эдим. Бу иккинчи сариқ ёки ҳатто қизил карточкага ҳам сабаб бўлиши мумкин эди, чунки у менинг футболчимнинг оёғига тепди.

Бу шунчаки эмоционал ҳолат эди. У ҳаёт китобида бўлмаслиги лозим бир сўзни айтди. Бу вазиятни янада кескинлаштирган бўлиши мумкин. Аммо биз профессионаллар сифатида дарҳол ўзимизни тўхтатдик. Футбол смокинг кийиб рақсга тушадиганлар учун эмас, балки жасур инсонлар учун», — деди Кейруш.

ЖЧ–2026 гуруҳ босқичининг сўнгги турида Англия (4) 28 июн куни Панамага (0) қарши майдонга тушади. Гана (4) эса Хорватия (3) билан баҳс олиб боради.