«Барселона» бош мураббийи Ҳанси Флик жамоанинг бразилиялик ҳужумчиси Рафиня клубда қолишини тасдиқлади. Немис мутахассиси 29 ёшли футболчини жамоа учун энг муҳим ўйинчилардан бири деб атади.
«Рафиня мен учун энг муҳим футболчилардан бири. У сифат ва интенсивлик олиб келади. Биз унга муҳтожмиз», — деди Флик. Бу ҳақда журналист Фабрицио Романо маълум қилди.
Рафиня «Барселона»га 2022 йил ёзида «Лидс»дан кўчиб ўтган. Бразилиялик футболчи каталонияликлар сафида асосан қанот ҳужумчиси сифатида, дастлаб эса чап қанотда ҳаракат қилган. Кейинчалик у ҳужум чизиғининг турли позицияларида ҳам самарали ўйнай бошлади. 2025 йил май ойида «Барселона» унинг шартномасини 2028 йил 30 июнигача узайтирган.
Рафиня «Барселона»даги дастлабки икки мавсумида 10 тадан гол урган ва мос равишда 12 ҳамда 11 та голли узатма амалга оширган. Унинг энг сермаҳсул мавсуми 2024/25 йилга тўғри келди: футболчи барча мусобақаларда 57 та учрашувда 34 та гол урди ва 22 та голли узатма берди. Бу натижа уни «Барселона» ҳужумидаги энг муҳим футболчилардан бирига айлантирди.
2025/26 йилги мавсумда эса жароҳатлар туфайли анча ўйин ўтказиб юборганига қарамай, Рафиня 21 та гол урди. У Испания Суперкубоги финалида «Реал»га қарши дубл қайд этиб, учрашувнинг энг яхши футболчиси бўлган.
«Барселона»нинг расмий маълумотларига кўра, у ҳозиргача 177-ўйинини ўтказган ва 75 та гол ва 51 та голли узатма қайд этган.
