«Barselona» vingeri Lamin Yamal Ispaniya milliy jamoasining Xorvatiyaga qarshi bahsida samarali harakat qayd eta olmadi. Ispanlar safarda 2:1 hisobida g‘alaba qozongan bahsda 19 yoshli futbolchi asosiy tarkibda maydonga tushdi.
Yamal 78-daqiqaga qadar maydonda harakat qildi va shundan so‘ng uning o‘rniga boshqa futbolchi tushirildi. Shu tariqa ispaniyalik futbolchi 27-avgustdan buyon ilk bor gol yoki golli uzatmasiz bahsni yakunladi. O‘shanda Yamal «Atletik»ka qarshi bahsda samarali harakat qayd eta olmagandi.
Shundan keyingi to‘qqizta bahs davomida esa vinger doim gol urish yoki sheriklariga golli uzatma berish orqali jamoasiga foyda keltirdi. Ushbu davrda Yamal klub va milliy jamoa safida jami 12 ta gol urib, yana 7 ta golli uzatmani amalga oshirdi.
Xorvatiyaga qarshi bahsda Ispaniya milliy jamoasiga g‘alabani Mikel Merinoning dubli ta’minladi. Mezbonlar hisobni ochgan bo‘lsa-da, ispanlar ikkinchi bo‘limda ikkita gol urib, bahs taqdirini o‘z foydasiga hal qildi.
Ma’lumot uchun, ushbu g‘alabadan so‘ng Ispaniya milliy jamoasi Millatlar ligasi guruh bosqichida ketma-ket to‘rtinchi g‘alabasini qo‘lga kiritdi.
