«Катта дубулға» туркумига кирувчи мусобақаларнинг 24 карра ғолиби, дунёнинг 11-ракеткаси сербиялик теннисчи Новак Жокович Хитойнинг Пекин шаҳрида ATP-500 тоифасидаги турнирда кетма-кет 33-ғалабасини қўлга киритди. Бугун, 5 октябр куни у яримфиналда жаҳон рейтингида бешинчи ўринни эгаллаб турган россиялик Даниил Медведевни мағлуб этди. Беллашув 7:5, 5:3 ҳисобида якунланди (Медведев тўп мухлисга теккани учун дисквалификация қилинди).
Маълумот учун, Жокович Пекинда олти марта чемпионликни қўлга киритган. У охирги марта 2015 йилда Хитой пойтахтидаги турнирда иштирок этганди.
Финалда Новак дунёнинг тўққизинчи ракеткаси австралиялик Алекс де Минаур билан куч синашади.
Эслатиб ўтамиз, Пекиндаги турнир финали 6 октябрда бўлиб ўтади. Мусобақанинг амалдаги ғолиби италиялик теннисчи Янник Синнер ҳисобланади.
