Йован Жокич: «Бошқа жароҳатлар билан солиштирганда бу унчалик қўрқинчли эмас»

Фарғонанинг «Нефтчи» клубида охирги пайтларда йўқотишлар кўп бўлганини билсангиз керак.

Бир қатор футболчилар жароҳатланишди. Улардан бири сербиялик таянч яримҳимоячиси Йован Жокич бўлиб, у операция столига ҳам ётишга мажбур бўлди.

Хўш, Жокичнинг ҳозирги ҳолати қандай? Бу борада Tribuna.uz журналисти Йован билан суҳбат уюштирди.

- Йован, аввало, ҳозирги ҳолатингиз ҳақида сўрамоқчиман. Жароҳатдан сўнг операция ўтказдингиз. Ҳозир ўзингизни қандай ҳис қиляпсиз ва тикланиш жараёни қандай кечмоқда?

- Ҳозир реабилитация жараёнини ўтаяпман ва аллақачон аста-секин югуришни бошладим. Ҳозирча барчаси яхши кетяпти ва умид қиламанки, тез орада Фарғонага қайтаман.

- Футболчи учун операция ва майдондан узоқ вақт четда қолиш жиддий синов. Бу даврда сиз учун энг қийини нима бўлди — жисмоний оғриқ, футболдан узоқда бўлиш ёки руҳий босим?

- Ҳа, албатта, жисмоний оғриқ ҳам бор, аммо асосий роль психологияга тегишли. Жамоангизни кузатиб, йигитларни кўриб, уларга ёрдам бера олмаётганингизни англаш — менимча, энг катта муаммо ҳам айнан шунда.

- Жароҳат олган пайтингизда оқибатлар бунчалик жиддий бўлишини тахмин қилганмидингиз? Ташхис ҳақида биринчи бор эшитганингизда нимани ҳис қилдингиз?

- Менда бу жароҳат аста-секин йиғилиб борган. Бир пайт келиб, оғриққа қарамай ўйинни давом эттира олмай қолдим. Менга омад кулиб боқди, чунки пай атрофидаги тўқималарни тозалаш операциясини ўтказишнинг ўзи кифоя қилди ва тикланиш даврим уч ойни ташкил этади. Бошқа жароҳатлар билан солиштирганда, бу унчалик қўрқинчли эмас.

- Ҳозир сиз «Нефтчи»нинг таркибидан чиқарилдингиз ва клуб сизнинг ўрнингизга бошқа футболчини таклиф қилди. Бу ҳақда нима дея оласиз? Бу қарорни қабул қилиш сиз учун қанчалик оғир бўлди?

- Айнан шундай. Биласизми, жамоага 100 фоизимни бера олмаётганимни тушунганимиздан сўнг, мураббий билан вазиятни муҳокама қилдик ва жамоа учун энг тўғри қарорни биргаликда қабул қилдик.

- «Нефтчи» раҳбарияти ва жамоадошларингиз тикланиш жараёнида сизни қандай қўллаб-қувватламоқда?

- Клуб ҳар доим ёнимда бўлди ва операциядан олдин ҳам, кейин ҳам мени қўллаб-қувватлади.

- Тўлиқ тикланганингиздан сўнг клубда қолиш ва яна шу жамоа сафида майдонга қайтиш сиз учун қанчалик муҳим?

- Худо хоҳласа, йил охирига қадар Чемпионлар лигасида ҳеч бўлмаса бир нечта ўйинда майдонга тушишга тайёр бўламан, деган умиддаман.

- Бу жароҳат футболга — касбингизга бўлган муносабатингизни ўзгартирдими? Масалан, энди соғлик, футбол ва майдондаги ҳар бир дақиқани бошқача қадрлай бошладингизми?

- Саломатлик — энг муҳими. Аммо ҳозир ўзимни аввалгидан ҳам кучлироқ ҳис қиляпман.

- Ҳозир тикланиш жараёнида сизга энг кўп ким далда беряпти? Оила, жамоадошлар, мураббийлар ва мухлисларнинг қўллаб-қувватлаши сизга қанчалик ёрдам беряпти?

- Операциядан кейинги тикланиш жараёнида оила жуда муҳим роль ўйнайди. Улар доимо ёнимда ва машғулотлар ҳамда ўйинларга имкон қадар тезроқ қайтишим учун менга куч беришмоқда. Албатта, клуб, мураббийлар ва доимо ёнимда бўлган мухлислардан ҳам катта қўллаб-қувватлов олмоқдаман. Улар майдонда ҳам, майдон ташқарисида ҳам мени қўллаб-қувватлаб келишган.

- Ва энг муҳими: сизга ишонаётган ва қайтишингизни кутаётган «Нефтчи» мухлисларига нима деган бўлардингиз? Сизни яна майдонда кўришлари учун, тахминан, яна қанча вақт кутишларига тўғри келади?

- Имкон қадар тезроқ қайтиш учун қўлимдан келган барча ишни қиляпман ва умид қиламанки, тез орада майдонда яна кўришамиз!