Italiyalik darvozabon Janluiji Donnarumma «Manchester Siti»ni tark etishi va faoliyatini Germaniya Bundesligasida davom ettirishi mumkin. Bu haqda Transfer News Live ma’lum qildi.
Manbaga ko‘ra, 27 yoshli darvozabonning xizmatlariga Myunxenning «Bavariya» klubi qiziqish bildirmoqda. Donnarumma «Manchester Siti»dagi vaziyat, xususan, klubga moliyaviy qoidabuzarliklar bo‘yicha jiddiy choralar qo‘llanishi mumkinligi sababli boshqa jamoaga o‘tish variantini ko‘rib chiqishi ehtimoli bor.
Donnarumma 2025-yilda «Manchester Siti» safiga qo‘shilgan. Uning Angliya klubi bilan shartnomasi 2030-yil iyun oyi oxirigacha amal qiladi. Darvozabonning transfer qiymati taxminan 45 mln yevroga baholanmoqda.
Ushbu mavsumda italiyalik futbolchi Angliya Premyer ligasida beshta bahsda maydonga tushib, o‘z darvozasidan beshta gol o‘tkazib yuborgan.
Ma’lumot uchun, Donnarumma faoliyati davomida «Milan» va «PSJ» klublari safida ham to‘p tepgan. U Italiya milliy jamoasining asosiy darvozabonlaridan biri hisoblanadi.
