Суперлиганинг 12-турига старт берилди. Фарғонада «Нефтчи» «Бухоро»ни қабул қилди.
Кутилганидек ўйин иккала жамоа учун қийин кечди. Айниқса, майдон эгалари катта куч сарфлашига тўғри келди. Бухороликлар эса кутилганидек, мезбонларга жиддий қаршилик кўрсатишди.
Ҳисобда ортда бораётган «Нефтчи» иродасини ва характерини кўрсатишига тўғри келди. Охирги 10 дақиқаликда Ислом Исмоилов шогирдлари жуда керакли иккита гол киритишга ҳамда ғалабани илиб кетишга муваффақ бўлишди.
Ўйиндан кейин фарғоналиклар бош мураббийи Ислом Исмоилов қуйидагича фикр билдирди:
«Биринчи навбатда барча мухлисларимизни қийин кечган ғалаба билан табриклайман. Ўйлайманки, бугун ажойиб ўйин кўрсатдик. Бунинг учун футболчиларга миннатдорчилик билдирмоқчиман. Характер кўрсатишди ва охиригача кураш олиб бордик. Сўнгги дақиқаларда ўзимиз хоҳлаган ўйинни кўрсатишни бошлаганимиз учун гол киритдик ҳамда ғалабага эришдик. Бундан ташқари, учрашув давомида ҳам тўлиқ устунлик қилдик. Рақибга деярли ҳеч қандай имконият бермадик. Шунинг учун ўйин тўлиқ бизнинг назоратимизда ўтди.
Одатда, бундай узоқ танаффусдан кейин қайтиш қийин бўлади. Турган поездни жойидан қўзғатиш учун жуда катта куч сарфланади. Жамоа ритмга тушган пайтда танаффусга чиқиб кетилди. Деярли 2 ой давомида етакчи футболчиларсиз машғулотлар олиб бордик. Бу ҳам ўйин сифатига албатта таъсир қилади.
Таркибимиздаги кўплаб ўйинчилар терма жамоаларга номзод ҳисобланишади. Шу сабабли деярли икки ой давомида тўлиқ таркиб билан шуғуллана олмадик. Шунга қарамасдан бугун иккала таймда ҳам ўзимизни сифатли футболимизни кўрсатишга ҳаракат қилдик. Бу олдиндан маълум эди. Футболчиларга ҳам ўйиндан олдин бу мавсумдаги энг қийин ўйин бўлиши мумкинлигини айтгандим.
Чунки бундай узоқ танаффусдан сўнг ҳар қандай жамоани қайтиши ҳам қийин бўлади. Боз устига доим ҳимояда ўйнайдиган жамоага қарши ўйнаш жуда оғир кечади. Ўзи шундоқ ҳам бутун дунёда учинчи зонадаги ҳимояни ёриб ўтишга қийналишяпти. Ўйиндан келиб чиқиб, охирги 10 дақиқада Икром Алибоевни марказий ҳимоя ва Йован Жокични ҳужумга олиб чиққанимиз ҳисобига жамоамиз иккинчи голни киритишга муваффақ бўлди» - дея Исмоиловнинг сўзларидан келтиради Tribuna.uz мухбири.
