Bosniya va Hersegovina milliy jamoasi hujumchisi Edin Jeko milliy jamoadagi faoliyatini yakunlashini e’lon qildi. Bu haqda u ijtimoiy tarmoqdagi sahifasida yozdi.
Jekoning so‘zlariga ko‘ra, 2 oktyabr kuni Millatlar ligasi doirasida Shvetsiyaga qarshi bahs uning milliy jamoadagi so‘nggi o‘yini bo‘ladi.
«2 oktyabr kuni Shvetsiyaga qarshi bahsda milliy jamoamiz safidagi navbatdagi va so‘nggi o‘yinimni o‘tkazaman. Faoliyatimda bu futbolkani har safar kiyganimda his qilgan faxrim bilan tenglasha oladigan hech narsa bo‘lmagan», — deb yozdi Jeko.
Ma'lumot uchun, 40 yoshli hujumchi Bosniya va Hersegovina milliy jamoasi safida qariyb 20 yil davomida 151 ta bahsda maydonga tushgan.
Jeko 2014 yilgi jahon chempionatida Bosniya va Hersegovinaning ilk bor ishtirok etganini faoliyatidagi eng baxtli lahzalardan biri sifatida tilga oldi. Shuningdek, Uels darvozasiga urgan goli va mart oyida Italiyaga qarshi bahsdagi voqealarni ham esladi.
«Milliy jamoada o‘ynash men uchun futboldagi eng hissiyotli voqea bo‘ldi. Endi chetga chiqish vaqti kelganini his qilyapman», — dedi Jeko.
Muxlislar bu yangilikni Telegram’da muhokama qilmoqda
Izohlar Telegram’da ochiladi