Ўзбекистон миллий жамоаси бош мураббийи Фабио Каннаваро «Марказий сектор» лойиҳасида Даврон Файзиевга интервью бериб, мамлакат президенти Шавкат Мирзиёев билан суҳбат нима ҳақида бўлганини очиқлаб, давлат раҳбарининг футболчиларга қарата айтган гапларини қўллаб-қувватлади.
«Суҳбатимиз ажойиб ўтди. Сабаби президент футболни жуда яхши билади. Президент футболни ривожлантириш бўйича ажойиб тушунчага эга. Президентга неаполлик эканлигимни ва шу орқали Италияда футбол маданияти қандай эканлигини, кўчаларда, қишлоқлардаги майдонларда ва ҳаттоки черковларда ҳам футбол ўйналганини, бу нормал ҳолат бўлганини айтдим. Президент футболни ривожлантириш бўйича яхши тушунчага эга эканлиги учун ҳам Ўзбекистонда футбол тез ўсишга эришмоқда.
Президент ажойиб фикр билдириб ўтди. Яъни, футболчиларимиз жаҳон чемпионатига боришганда ҳеч қандай босимни ҳис қилмай, қўрқувсиз ўйнашлари кераклигини айтди. Ростдан ҳам футболчи қўрқувсиз ўйнайдиган бўлсагина, энг яхши ўйинини кўрсата олиши мумкин. Ўзим ҳам уларга ЖЧ-2026дан баҳра олишимиз муҳимлигини айтдим. Жаҳон чемпионати – биз учун катта футбол байрами. Бутун дунёга нимага қодирлигимизни кўрсата олсак, мундиалдан баҳра олишимизни айтдим», - деди Каннаваро суҳбатда.
Эслатиб ўтамиз, Ўзбекистон миллий жамоаси ЖЧ-2026даги дастлабки ўйинни 18 июн санасида Колумбияга қарши майдонга тушса, 2-турда Португалия, 3-турда Конгога қарши саф тортади.
