Испаниянинг Defensa Central нашри хабарига кўра, «Монтеррей» марказий ҳимоячиси Серхио Рамос бу қишда Мадриднинг «Реал» клубига қайтиши мумкин. 39 ёшли футболчининг Мексика клуби билан шартномаси якунланмоқда ва у бир ой ичида эркин агент мақомини олади. Бу эса унинг трансферини компенсациясиз амалга ошириш имконини беради.
Мадридликлар марказий ҳимояда жароҳатлар сабаб юзага келган муаммоларни бартараф этиш учун тажрибали футболчи қидирмоқда. Шу боис Рамос номзоди «Реал»нинг қишки кучайтириш режаларида долзарб вариант сифатида кўрилмоқда.
Серхио Рамос 2005–2021 йиллар оралиғида «Реал» сафида 16 мавсум ўйнаб, клуб тарихидаги энг муҳим футболчилардан бирига айланган. У мадридликлар формасида 671 та ўйинда майдонга тушиб, 101 та гол урди ва 40 та голли узатма берди. Рамос «Реал» билан тўрт марта Чемпионлар лигаси ва беш бор Ла Лига чемпионлигини қўлга киритган.
У жорий йилнинг февралидан бери «Монтеррей» шарафини ҳимоя қилиб келмоқда. Мексика клубида у 30 та ўйинда қатнашиб, 7 та гол уришга муваффақ бўлган.
