«Osasuna» klubining 22 yoshli vingeri Viktor Munos Madridning «Real» klubiga qaytmaydi.
Insayderning ma’lumotiga ko‘ra, «qaymoqranglilar» Munosni qaytib sotib olish imkoniyatidan foydalanmaslikka qaror qilgan. Yaqin orada futbolchi «Nyukasl» safiga borib qo‘shilishi kutilmoqda. Inglizlar «Osasuna»ga transfer bo‘yicha rasmiy taklif yuborishga ulgurgan.
Romanoning yozishicha, «Real» Munosning 50% transfer huquqiga ega va «Nyukasl»ga transfer amalga oshgan taqdirda, ispan grandi taxminan 17 million yevro foyda ko‘radi.
O‘tgan yil yozida «Real» Munosni «Osasuna»ga bor yo‘g‘i 5 mln yevroga sotib yuborgan edi. Yangi jamoasi tarkibida vinger barcha musobaqalarni inobatga olganda 36 o‘yinda 7 ta gol urdi va 5 ta golli uzatma yetkazib berdi.
