Ўзбекистон Суперлигаси иштирокчи клублари 2026 йилги мавсумдан бошлаб давлат томонидан молиялаштирилади. Бу ҳақда Президент қарори қабул қилинди.
Ўзбекистон Республикаси Президентининг «спорт соҳасини молиялаштириш механизмларини такомиллаштириш ва соҳага тадбиркорлик субьектларини жалб қилишни кенгайтириш чора-тадбирлари тўғрисида»ги қарорида қайд этилишича, 2026 йилда Суперлиганинг 16та клубини молиявий қўллаб-қувватлаш учун ҳар бир жамоага 35 миллиард сўмдан маблағ ажратилади. Қарорда Про лига клублари ҳам молиявий қўллаб-қувватланиши белгиланган.
Футбол клубларига бу маблағ Спорт вазирлиги қошидаги махсус жамғармадан тақсимланади. 2026 йилда давлат бюджетидан футбол клублари, Олимпия ва паралимпия ҳаракати ҳамда спорт федерацияларни қўллаб-қувватлаш учун жами 700 миллиард сўм ажратилган. Ҳужжатда маблағнинг тақсимланиш миқдорлари, ажратилиш муддатлари ҳам аниқ кўрсатилган.
Шунингдек, хусусий компания ва ҳомийларга профессионал футбол клубларига ҳомийлик қилиш бўйича имтиёз берилиши белгиланган.
Эслатиб ўтамиз, «Ўзбекнефтгаз» давлат компанияси йил бошида «Бунёдкор», «Насаф» ва «Бухоро»га ҳомийлик қилишни тўхтатган эди. Шундан сўнг «Насаф» Қашқадарё вилояти ҳокимлиги томонидан, «Бухоро» эса Бухоро вилояти ҳокимлиги томонидан молиявий қўллаб-қувватлаб келинаётган эди.
Аввалроқ, 2026 йилда Суперлигада энг катта йиллик бюджет «Нефтчи», «Андижон», «Пахтакор», «Насаф» ва «Навбаҳор»да экани ҳақида хабарлар тарқалганди. Хусусан, Фарғона вилояти ҳокими Хайрулло Бозоровнинг ташаббуси билан «Нефтчи» олдига юқори мақсадлар қўйилган бўлиб, клубнинг йиллик бюджети 170 миллиард сўмдан кўпроқни ташкил қилиши айтилганди.
