Инфантино ЖЧ ҳуқуқларини сотишга рози бўлган мамлакатларга 40 млн доллардан таклиф қилди

Жанни Инфантино Жаҳон чемпионати ҳуқуқларининг бир қисмини сотишдан тушган даромаддан FIFA'га аъзо мамлакатларга улуш таклиф қилмоқда.

Аввалроқ FIFA президенти турнир ҳуқуқларининг бир қисмини ташқи инвесторларга сотишни режалаштираётгани маълум бўлганди.

The Times маълумотларига кўра, Инфантино унинг режаси қўллаб-қувватланадиган тақдирда ташкилотга аъзо бўлган 211 та ассоциациянинг ҳар бирига 40 миллион доллардан тўлашга ваъда берган. Шу билан бирга, уларда таклифни қабул қилиш учун атиги 53 кун бор.

«Бу таклифни қабул қилиш ёки қилмаслик бўйича қарор тўлиқ сизларнинг ихтиёрингизда. Агар сиз уни қабул қилишни истасангиз, 10 миллиард долларлик пакет 2027 йил 1 январдан бошлаб амалга киритилади ва бу бизнинг умумий йўлимизнинг кейинги босқичи бошланганини англатади.

Агар сиз мавжуд ҳолатни сақлаб қолишга ва бу таклифни рад этишга қарор қилсангиз, биз аввал айтилганидек, молиялаштиришни оширишга қаратилган Forward дастурини 2,7 миллиард долларга кенгайтиришга тайёрмиз.

Умуман олганда, 2027 йил 1 январдан бошланадиган навбатдаги цикл давомида ҳар бир аъзо-ассоциация ушбу таклиф доирасида 40 миллион долларгача маблағ олиши мумкин», — дейилади Инфантинонинг хатида.

Ташқи инвесторлар билан тузилиши мумкин бўлган келишувга қаршилар Инфантинонинг молиялаштиришни ошириш ҳақидаги таклифини «пора бериш» деб аташди.