Эмболо ҳам ковидга тест топширгани ҳақида сохта сертификат олганини тан олди

«Атланта Юнайтед» клуби ва Швейцария миллий жамоаси ҳужумчиси Бреэл Эмболо коронавирусга тест топширгани ҳақида сохта сертификат олганини тан олди.

Blick нашри Schweiz heute’га таяниб хабар беришича, футболчи 2021 йилда Базелдаги лабораторияда ишлаган таниши орқали COVID-19 тест натижаси ҳақидаги икки сохта маълумотномани олган.

Таниш аёл бошқа одамларнинг номидан бурун ва томоқдан суртма намуналарини олган. Шунингдек, у Word дастуридаги шаблондан фойдаланиб, сохта сертификатлар тайёрлаган ва уларни PDF форматига ўтказган.

2025 йил 25 ноябрда Базел прокуратураси Эмболони ҳужжатларни сохталаштиришга ундаш билан боғлиқ бир нечта банд бўйича айбдор деб топди. Спортчига жами 60 минг Швейцария франки (63 минг евро) миқдорида жарима жазоси тайинланди. Жазо шартли ҳисобланади, синов муддати эса икки йил.

«Ўша пайтдаги ҳаракатларим нотўғри бўлганини англадим ва улар учун масъулиятни ўз зиммамга олдим. Шунинг учун суд қарорини қабул қилдим», — деди Бреэл ОАВ сўровига жавобан.

Швейцария футбол уюшмаси ҳужумчининг ташкилот вакилларига «шахсий ҳаётига тааллуқли, бугун ОАВга маълум бўлган вазият ҳақида» хабар берганини тасдиқлади. Шу муносабат билан у Миллатлар лигасида миллий жамоанинг яқиндаги — Шимолий Македония, Шотландия ва Словенияга қарши баҳсларини ўтказиб юборади.

Дастлаб ҳужумчи Шимолий Македония миллий жамоасига қарши ўйинни дисквалификация сабабли (Жаҳон чемпионатида қизил карточка олган) ўтказиб юбориши керак эди. Бироқ кейинги ўйинларга таркибга киритилиши мумкин эди.

Эслатиб ўтамиз, аввалроқ Швейцария миллий жамоаси ярим ҳимоячиси Гранит Жака ҳам коронавирусга қарши эмланиш сертификатини сохталаштирганини тан олганди. У ҳам миллий жамоанинг бўлажак ўйинларида иштирок этмайди.