Ўзбекистон ўсмирлар терма жамоаси аъзолари Садриддин Ҳасанов ва Сайфиддин Содиқов фаолиятини Европада давом эттириши кутилмоқда.
Россиялик инсайдер Иван Карповнинг ёзишича, Португалиянинг «Брага» клуби ўзбекистонлик 17 ёшли икки футболчини «Бунёдкор» клуби ва Одил Аҳмедов футбол академиясидан бир йиллик ижара асосида ўз сафига қўшиб олишга қарор қилган. Ҳасанов ва Содиқов 2026 йилнинг ёзида 18 ёшга тўлгач, «Брага» сафига қўшилади.
Қайд этилишича, Португалиянинг 4-клуби саналадиган «Брага» раҳбарияти ўзбекистонлик ёш иқтидорларни Қатарда ўтган ўсмирлар ўртасидаги ЖЧ-2025да кузатиб борган. Ҳар икки футболчи декабр ойида португал клуби таклифига кўра, жамоада икки ҳафталик йиғинда қатнашган ва мураббийлар штабида илиқ таассурот қолдиргач, бу борада расмий таклиф жўнатган.
Манбага кўра, «Брага» ва ўзбек клублари ўртасидаги келишувга биноан, португал клуби футболчини ижара муддати якунига етгандан кейин ўз сафида қолдиришга қарор қилса, Садриддин Ҳасановни 250 минг евро, Сайфиддин Содиқовни эса 300 минг еврога сотиб олиши ва 5 йиллик шартнома имзоланиши белгиланган.
«Бу маълумотларни аслида клублар эълон қилиши лозим. Бу йигитлар аллақачон Португалияда бўлиб, клубда синовдан ўтишди. Ҳозирча сизга фақат шуни маълум қила оламан. Қолганини клублар расман эълон қилишини кутамиз», - деди футболчиларнинг ҳуқуқини ҳимоя қилувчи ProSports Management агентлиги расмийси, собиқ футболчи Егор Кримец.
«Ўзбекистонлик янги дуэт Португалиядаги фаолияти орқали Абдуқодир Ҳусанов, Элдор Шомуродов каби футболчилар йўлини такрорлашга уриниб кўради», - дейилади хабарда.
Эслатиб ўтамиз, 17 ёшли ҳужумчи Ҳасанов 2025 йил якунларига кўра The Guardian таснифига кўра жаҳоннинг энг иқтидорли 60 футболчиси рейтингидан жой олганди. У Осиё кубоги U17 турнирининг энг яхши ўйинчиси деб топилганди. 2025 йил якунида эса ЎФА томонидан Ўзбекистоннинг энг яхши ёш ўйинчисига айланганди. Содиқов эса Осиё кубоги U17нинг энг яхши ассистентига айланганди.
Маълумот учун, «Брага» Португалия чемпионатида «Порту», «Бефика» ва «Спортинг»дан кейинги 4-ўринни эгаллаб турибди. Европа лигасида эса яримфиналга йўл олиб, «Фрайбург»га қарши майдонга тушади.
